Bakı, 22 oktyabr, AZƏRTAC

Uşaqlıq illərindən Azərbaycanı müstəqil görmək eşqi ilə böyüyən, bütün diqqətini bu istiqamətə kökləyən Azərbaycan xalqının fenomen oğlu Heydər Əliyev ömrünün əsas hissəsini Azərbaycanın quruculuq işlərinə həsr etdi. Təhlükəsizlik orqanında fəaliyyətə başladığı zamandan ta ömrünün sonuna qədər milli ruhun dirçəldilməsinə, milli kadrların yetişdirilməsinə, önə çəkilməsinə üstünlük verdi. Xalqımızın intellekt potensialını, zəkalı insanlarını qorudu. Onların yüksək bilik əldə etmələri üçün geniş meydanlar açdı. Ümumiyyətlə, milli kadrların yetişməsi istiqamətində xüsusi proqramlar həyata keçirdi. Beləcə, həm respublikamızın inkişafına nail oldu, həm də azərbaycanlıların elmi, mədəni səviyyəsinin yüksəlməsini təmin etdi. Sənət və ədəbiyyat xadimlərimizin dünya miqyasına çıxmasını, onların öz fitri istedadları ilə nümunəyə çevrilə bilmək imkanlarını genişləndirdi. Onlara xüsusi diqqət və qayğı göstərdi. Bu kimi siyasi gediş əhalimizin ümumi intellekt səviyyəsinin yüksəlməsini və millətlər arasında seçkin yerinin müəyyənləşməsini təmin etdi.

Bu fikirlər Cəfər Cabbarlı adına İrəvan Dövlət Azərbaycan Dram Teatrının direktoru, Əməkdar mədəniyyət işçisi, sənətşünaslıq üzrə fəlsəfə doktoru İftixar Piriyevin “Xalqına sevgisini can yanğısı ilə ifadə edən Dahi” sərlövhəli yazısında yer alıb. AZƏRTAC yazını təqdim edir.

Milli kontekstdə sadalanacaq saysız-hesabsız uğurlu, məntiqli gedişlərə Heydər Əliyev azərbaycançılıq məfkurəsi kimi yanaşırdı və bu yolda bütün zəkası və fiziki gücü ilə gecə-gündüz çalışırdı. Özünü doğma xalqına hər zaman borclu missiyası ilə istismar edən o nəhəng şəxsiyyət hər bir azərbaycanlının taleyinə öz taleyi kimi baxırdı. Biz bu gerçəkliyi dərk etməli və Heydər Əliyev fenomeninə nə qədər borclu olduğumuzu unutmamalıyıq. İstər ədəbiyyatımız, istər incəsənətimizin bütün qolları, istər digər bütün sahələr Heydər Əliyevin onlara bəxş etdiyi əvəzolunmaz töhfələrin dəyərini bilməlidirlər. Məlumdur ki, bu deyilənlər bir gerçəklikdir və göz önündədir. Lakin təəssüflər olsun ki, bəzən gerçəkliyi görmək istəməyən qısqanclar və bacarıqlı ola bilməyən xəbislər, paxıllıq hisslərini boğa bilməyən əks fikirlər formalaşdırmağa çalışan nadanlar gözlərimiz önündə vurnuxurlar, ancaq xalqımızın intellektual zümrəsi Heydər Əliyev gerçəkliyini tarixin səhifələrinə olduğu kimi həkk etməklə gələcək nəslin doğru-düzgün formalaşmasını təmin edirlər. Mənim üçün fərəhlidir ki, müəllifi olduğum - “Böyük Turanın himni”, “Müstəqil vətənin memarı” poemaları, “Qurtuluş dastanı”, “Qurtuluşa gedən yol”, “Naxçıvanda doğan Günəş”, tarixi-xronoloji dramlar, “Nurlu ömrün anları”, “İşıqlı nurlu sabah” mənzum pyeslər ümummilli liderimizin keçdiyi cəfakeş, əzmkar, qurucu ömür yolunun azacıq da olsa bir hissəsini ədəbiyyatın və teatr sənətinin salnaməsinə həkk edə bilmişdir. Bunlar bir sənət xadimi olaraq bizim üçün qürurverci xidmətdir. Səhnədə əvəzolunmaz özünəməxsusluqlarını sevərək canlandırdığım, bütün ali cəhətlərini real hisslər və duyğularla tamaşaçılara çatdırmağa çalışdığım Ümummilli Liderimizin bədii obrazının tamaşaçılar tərəfindən sürəkli alqışlarla, sevgi və məhəbbətlə qarşılandığını gördükcə, bir sənət xadiminin keçirdiyi hissləri, duyğuları sözlərlə ifadə etmək belə çətindir.

Bir xalq, bir millət o zaman xoşbəxt olur ki, onun lideri bütün varlığı, ruhu və məfkurəsi ilə xalqına, millətinə bağlı olur. Canından çox onları sevir. Məhz Heydər Əliyev dəfələrlə xalqına, millətinə olan sevgisini can yanğısı ilə ifadə etmişdir. Əsas odur ki, bu sevgini bütün əməlləri, xidmətləri ilə isbat etmişdir. O heç vaxt xalq yolunda heç bir qəsddən, qərəzdən çəkinmədi. Hər bir təhlükəyə cəsarətlə sinə gərdi. Ömrünün sonuna qədər bu yolda bütün varlığı və ruhu ilə çalışdı, millət yolunda heç nəyi əsirgəmədi.

Ulu öndərin şəxsiyyəti, Azərbaycan xalqının tarixindəki misilsiz rolu bu gün incəsənətimiz üçün tükənməz mövzu mənbəyidir. Rəssamlarımız dəfələrlə bu böyük şəxsiyyətin obrazını yaradıb, haqqında neçə-neçə musiqi əsəri bəstələnib, teatrlarımızın səhnəsində Ulu Öndərə həsr olunmuş əsərlər səhnəyə qoyulub, ömür yoluna həsr olunan filmlər çəkilib. Bunların hər biri incəsənət tariximizin qiymətli əsərləri kimi qalacaqdır.

Ulu Öndərin teatr və bu sahədə çalışan insanlar haqqındakı fikirləri də olduqca qiymətlidir: “Teatr müqəddəs yerdir. İnsanların mənəvi cəhətdən formalaşmasında teatr həmişə çox böyük rol oynamışdır. Mən həmişə teatra bağlı və yaxın olmuşam. Bu ötəri hiss deyildir. İçimdən gələn bir məhəbbətdir. Teatrı çox sevirəm. Teatra məhəbbət mənim içimdədir. İncəsənətin, o cümlədən kino və teatrın təsiri və tərbiyə qüvvəsi çox böyükdür. Bu qüvvədən bacarıqla istifadə etmək həmişə vacibdir. Teatr və incəsənət sahəsində çalışanlar çox fədakar insanlardır. Səhnədə onlara baxanda çox vaxt qayğısız xoşbəxt insan kimi görünürlər, həmişə şəndirlər. Ancaq onların həyatının səhnə arxasında necə olmasını çoxları bilmir, heç təsəvvürlərinə də gətirmir. Mən bunları bilirəm. Ona görə də incəsənət adamlarını cəmiyyətdə çox yüksək tuturam. Xalqımız öz incəsənətini, mədəniyyətini, ədəbiyyatını inkişaf etdirib və bütün bunların üzərində indi müstəqil Azərbaycan Respublikası vardır”.

Ulu Öndərin bu sözləri mədəniyyət və incəsənətimizin böyük hamisi, fenomen şəxsiyyət Heydər Əliyevin teatr sənətinə verdiyi yüksək qiyməti bütün parlaqlığı ilə əks etdirir. 1969-cu ildən, yəni Ulu Öndərin respublikamıza rəhbərlik etdiyi dövrdən başlayaraq Azərbaycan teatrının həyatında coşqunluq hiss olunmağa başlamışdır. Görkəmli sənət adamlarının yubileylərinin təntənəli şəkildə qeyd olunması, forma, məzmun və üslub etibarilə müxtəlif zəngin və rəngarəng müsabiqələrin təşkili müntəzəm xarakter almışdır.

Ümummilli lider Heydər Əliyev daim respublikamızda mədəniyyət ocaqlarının açılış mərasimində, müxtəlif teatr tamaşalarının premyerasında iştirak edib və səhnə arxasında aktyorlarla görüşərək onların problemləri ilə maraqlanıb. Ümummilli Liderin teatr ocaqlarına gəlişi, teatr kollektivlərini yeni-yeni yaradıcılığa səsləmiş, teatrlarımızın repertuarları zənginləşmiş və yeniləşmiş, klassiklərin əsərlərinin yozumuna müasir baxış qüvvətlənmişdir.

Ulu öndər Heydər Əliyevin fenomen qüdrəti hesabına qurulan müstəqil Azərbaycan dövləti Ümummilli Liderimizin siyasi varisi, Azərbaycan xalqının qəhrəman lideri İlham Əliyevin əvəzsiz, qayğıkeş əməyi ilə gözlərimiz önündə yüksək inkişaf mərhələsinə çatıb və günbəgün yenilənən vüsət ritmi ilə öz sarsılmaz yolunu davam etdirməkdədir.

Sevindirici haldır ki, xalqımız öz dahi Liderinin 100 illiyini qələbə əhval-ruhiyyəsi ilə qeyd edir. Azərbaycan xalqı 30 il idi ki, “Qarabağ!”, “Şuşa!” deyərək torpaqlarımızın düşmən tapdağından azad edilməsini səbirsizliklə gözləyirdi. İllərdir ki, Azərbaycan xalqının humanist lideri mənəviyyatı kor olan, insanlığa qənim kəsilən bir millətin “Sülh!” deyə bəsirətini açmağa çalışdı. Təəssüf ki, bu alicənab məqsədə dünya birliyi də dəstək vermədi və mənəviyyatı olmayan xalqın, millətin sülh anlayışı da ola bilməz və olmadı da. Odur ki, işıqlı zəka sahibi, Azərbaycan xalqının müdrik lideri, Müzəffər Ali Baş Komandan İlham Əliyev öz işini elə riyazi dəqiqliklə qurdu və elə böyük cəsarətlə həll etdi ki, bəsirətsizlər özlərini qaranlıq quyu dibində gördülər. İndi həmin quyudan çıxmaq üçün mütləq, mənəviyyatı zəngin millətin, xalqın liderinin ətəyindən yapışmaq məcburiyyətindədirlər. Yalnız belə olan halda onlar həmin qaranlıqdan sıyrılıb çıxa bilərlər.

“Hər bir insanın milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən Azərbaycanlıyam!”, - deyə dünyaya qürurla, fərəhlə, iftixarla xitab edən ulu öndər Heydər Əliyevin mənsub olduğu Azərbaycan xalqının məhz işıqlı, nurlu sabahlarını müəyyənləşdirmək iqtidarına malik olmağın parlaq təzahürünü biz, bu gün ölkəmizi ümumdünya müstəvisində öncüllər sırasına yüksəldən böyük siyasi zəkaya malik liderimizin simasında yaşamaqdayıq. Biz bir də onun eşqini yaşamaqdayıq ki, ümummilli lider Heydər Əliyevin daim inamla ifadə etdiyi “Şuşa hər bir azərbaycanlının, mən deyərdim ki, gözüdür, iftixar nöqtəsidir” fəlsəfəsi bu gün bir gerçəklikdir.

Qarabağın azadlıq müjdəsi, qayalara zəncirlənmiş Şuşanın yenidən qol-qanad açması xəbəri bizim mənəvi aləmimizə necə yüksək qida verdisə, eləcə də bir anın içindəcə mənəvi cəhətdən dünyanın ən zəngin xalqına çevrildik.

Heydər Əliyev İlham Əliyevin sərkərdəlik qüdrətinə inanırdı! O bilirdi ki, İlham Əliyev onun bütün vəsiyyətlərini nəyin bahasına olursa-olsun, qəhrəmancasına yerinə yetirəcək. Çünki O, həm dünyanın gedişatını öncədən uzun müddətə hesablaya bilmək bacarığında idi və hazırladığı liderin də məhz bu gedişatları önləyə biləcək qabiliyyətini əminliklə bilirdi.

Zaman göstərdi ki, Heydər Əliyev heç bir gedişdə səhvə yol verməmişdir. İlham Əliyev Heydər Əliyevdən sonra xalqımızı, millətimizi, dövlətimizi bütün cəhətlərdən qaranta ala biləcək yeganə şəxsiyyət, yeganə liderdir!

Onu da demək doğru olar ki, İlham Əliyevin siyasi varislik missiyası Heydər Əliyevin xalqına, millətinə sevgisini özündən sonra da yaşatdı! İlham Əliyev öz prezidentlik dövründə elə incə yollarla getdi ki, bütün dünyanı qarşısına ala biləcək bir miqyasa qədər yüksəldi və dünyanın ən böyük dövlətlərinin həmləsinə baxmayaraq, torpaqlarımızı düşmən tapdağından azad etdi. Xalqımızın sarsılmış ruhunu dirçəltdi və yüksəltdi. Eyni zamanda, Heydər Əliyevin də ruhu qarşısında öz varislik borcunu yerinə yetirdi. Bu əməlin özü fenomenlik və ümummilli liderlik qüdrətinin bariz nümunəsidir!

Heydər Əliyev elə bir fenomendir ki, onu yalnız Dahi Lider adlandırmaq olar! Xalqımız öz dahi liderini, o ali qüdrət sahibini heç zaman unutmayacaq və tarixin bütün dövrlərində Heydər Əliyev, zaman keçdikcə daha da seviləcək, xalqımızın qürur mənbəyi kimi həmişə ürəklərdə yaşayacaq! Əminliklə demək olar ki:

Müstəqil vətənimiz

İşıqlı, nurlu sabah!

Onu Heydər yaratdı,

Sabaha İlhamla bax!