Deputat: Azərbaycan beynəlxalq birliyin etibarlı və hörmətli üzvü kimi mövqeyini möhkəmləndirir
Bakı, 29 oktyabr, AZƏRTAC
Azərbaycanın beynəlxalq tədbirlərə ev sahibliyi etməsi ölkəmizin qlobal siyasi dialoqda artan rolunun, beynəlxalq nüfuzunun və müxtəlif tərəflər arasında qarşılıqlı anlaşmanın təşviqinə verdiyi töhfənin göstəricisidir. Bakı bu gün dünyanı narahat edən problemlərin müzakirə olunduğu, siyasi dialoqun aparıldığı, mədəniyyətlər və sivilizasiyalar arasında qarşılıqlı anlaşmanın təşviq edildiyi mühüm beynəlxalq platformalardan biri kimi tanınır.
Bu fikirləri AZƏRTAC-a açıqlamasında Milli Məclisin deputatı Səbinə Xasayeva deyib.
Deputat oktyabrın 27-də Bakıda keçirilən “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumun da bu baxımdan xüsusi əhəmiyyət daşıdığını bildirib: “Forum yalnız mədəniyyətlərarası münasibətlərin deyil, həm də qlobal təhlükəsizlik, münaqişələrin həlli, qarşılıqlı etimad və dayanıqlı sülhün təmin olunması kimi mühüm məsələlərin müzakirəsi üçün geniş imkanlar yaradıb. Prezident İlham Əliyev isə forumun mədəniyyətlərarası dialoqun təşviqində mühüm beynəlxalq platforma olduğunu vurğulayaraq Azərbaycanın multikulturalizm ənənələrinə, dini və etnik dözümlülük prinsiplərinə sadiqliyini qeyd edib. Dövlətimizin başçısı azərbaycançılıq ideologiyasının ölkəmizdə yaşayan bütün xalqları birləşdirdiyini, Vətən müharibəsi zamanı nümayiş etdirilən birlik və həmrəyliyin isə Azərbaycanın ərazi bütövlüyünün bərpasında mühüm rol oynadığını diqqətə çatdırıb”.
Səbinə Xasayeva qeyd edib ki, dövlətimizin başçısı çıxışında Azərbaycanın müstəqilliyinin, milli maraqlarının və dövlətçilik ənənələrinin qorunmasının vacibliyini vurğulayaraq, ölkəmizin beynəlxalq hüquqa uyğun olaraq ərazi bütövlüyünü və suverenliyini bərpa etdiyini, bundan sonra da sülh təşəbbüsü ilə çıxış etdiyini diqqətə çatdırıb. Prezident İlham Əliyev ölkəmizin iqtisadi potensialının, enerji təchizatçısı və nəqliyyat-logistika mərkəzi kimi rolunun, eləcə də multikulturalizm ənənələrinin ölkəmizin beynəlxalq nüfuzunu gücləndirdiyini qeyd edərək, müasir dünyada risklərə qarşı ayıq-sayıq olmağın və dayanıqlı sülhün təmin edilməsinin əhəmiyyətini vurğulayıb.
Bu mövqenin Azərbaycanın hərbi Qələbədən sonra regionda davamlı sülhün və sabitliyin təmin olunmasına yönəlmiş siyasi iradəsini nümayiş etdirdiyini diqqətə çatdıran S.Xasayeva deyib: “Azərbaycanın sülh təşəbbüsləri, Ermənistanla münasibətlərin normallaşdırılması istiqamətində atılan addımlar və Vaşinqtonda əldə olunan razılaşmalar Cənubi Qafqazda yeni siyasi reallıqların formalaşmasına zəmin yaradıb. Prezident İlham Əliyevin qeyd etdiyi kimi, Azərbaycan sülh sazişi təşəbbüsünü irəli sürməklə regionda qarşıdurma dövrünün başa çatmasına və əməkdaşlıq imkanlarının genişlənməsinə tərəfdar olduğunu nümayiş etdirib. Bu yanaşma ölkəmizin öz milli maraqlarını qorumaqla yanaşı, regional sabitliyə və beynəlxalq təhlükəsizliyə də töhfə vermək niyyətini əks etdirir.
Prezident İlham Əliyev, həmçinin Azərbaycanın beynəlxalq nüfuzunun möhkəmlənməsində ölkənin iqtisadi potensialının, aşağı xarici borc səviyyəsinin, enerji resurslarının etibarlı təchizatçısı və mühüm nəqliyyat-logistika mərkəzi kimi rolunun əhəmiyyətini vurğulayıb. Dövlətimizin başçısı Azərbaycanın əlverişli coğrafi mövqeyinin, müasir infrastrukturunun və qonşu dövlətlərlə qurduğu münasibətlərin regional və qlobal əməkdaşlıq üçün geniş imkanlar yaratdığını qeyd edib. O, ölkəmizin fəal xarici siyasətinin, siyasi iradəsinin və iqtisadi imkanlarının beynəlxalq mövqeyimizin güclənməsində mühüm rol oynadığını diqqətə çatdırıb. Prezident, həmçinin Azərbaycanın multikulturalizm ənənələrinin və mədəniyyətlərarası dialoqa verdiyi önəmin ölkəmizi beynəlxalq əməkdaşlıqda etibarlı tərəfdaş kimi tanıtdığını qeyd edib”.
Deputat vurğulayıb ki, VII Ümumdünya Mədəniyyətlərarası Dialoq Forumu və Prezident İlham Əliyevin çıxışı Azərbaycanın beynəlxalq münasibətlər sistemində tutduğu mövqenin mühüm istiqamətlərini bir daha nümayiş etdirib. Ölkəmiz öz suverenliyini və ərazi bütövlüyünü bərpa edən, sülh təşəbbüsləri irəli sürən, iqtisadi və tranzit imkanları ilə regional əməkdaşlığa töhfə verən, mədəniyyətlərarası dialoqu dəstəkləyən dövlət kimi çıxış edir. Bütün bu amillər Azərbaycanın beynəlxalq birliyin etibarlı və hörmətli üzvü kimi mövqeyinin möhkəmləndiyini göstərir.
Bölmənin digər xəbərləri
