Azərbaycan sərhədləri daxilində hansısa separatçı rejimin mövcudluğunu qəbul etməyəcək - ŞƏRH
Bakı, 5 sentyabr, AZƏRTAC
Azərbaycanın dövlətinin, Liderinin ortaya qoyduğu qətiyyətli mövqe Cənubi Qafqazla bağlı özünün neoimperialist maraqlarını həyata keçirmək istəyən gücləri ciddi şəkildə narahat edir. Ermənistanın Rusiyanın nəzarətindən çıxarılması istiqamətində Avropa güclərinin ortaya qoyduğu böyük planlar nəticəsində bir sıra güclər özlərinin Cənubi Qafqaz planlarını həyata keçirmək üçün yenidən fəaliyyətə başlayıblar. Çox təəssüf ki, bu planlarda bölgə xalqlarının, dövlətlərinin maraqları heç bir halda nəzərə alınmır. Çünki həmin güclər daha çox neoimperialist maraqlardan çıxış edirlər və bölgə xalqları daim onların belə maraqlarının həyata keçirilməsində alət olubdur. Bu güclərin başında çox təəssüf ki, demokratiyadan, insan haqlarından, beynəlxalq hüquq prinsiplərindən ağız dolusu danışan Fransa dövləti dayanır. Onun səriştəsiz lideri Makronun ortaya qoyduğu qeyri adekvat, Cənubi Qafqazdakı proseslərin diktə etdiyi şərtlərə qətiyyən uyğun olmayan, eyni zamanda, beynəlxalq hüquq prinsipləri ilə daban-dabana ziddiyyət təşkil edən mövqe çox təəssüf ki, Fransanın digər rəsmi şəxsləri və parlamentariləri tərəfindən də davamlı şəkildə təkrarlanır. Biz çox təəssüf ki, Fransa kimi dünyanın qlobal təhlükəsizlik sistemində özünün aparıcı rolunu təsdiq etməyə çalışan bir dövlətdən, müxtəlif bölgələrdə olduğu kimi, Cənubi Qafqazda da konstruktiv mövqe nümayiş etdirdiyini görmürük. İnsan haqları, demokratiya, beynəlxalq hüquqdan danışmaq haqqını Afrika səhralarında, Əlcəzair düzənliklərində itirən Fransa etdiyi cinayətlərə, soyqırımlarına, qətliamlara görə məsuliyyət daşımaq və utanmaq əvəzinə bu gün oxşar siyasəti Cənubi Qafqazda həyata keçirməyə çalışır. Özünün böyük qlobal dünya düzəni prosesində yerini və rolunu daha da artırmaq üçün əsas rəqibləri ilə mübarizədə əlaltılarına əsaslanaraq müxtəlif bölgələrdə konfrontasiyalar, münaqişə ocaqları formalaşdırmaq və bunların üzərindən bölgələrə təsir etmək imkanlarını reallaşdırmağa çalışan Fransa bu addımlarını çox təəssüf ki, müasir dəyərlər, demokratiya pərdəsi altında həyata keçirməyə çalışır.
Bu sözləri AZƏRTAC-a açıqlamasında politoloq Anar Əliyev deyib.
Onun sözlərinə görə, Fransanın Cənubi Qafqazdakı proseslərə təsiretmə mexanizmləri, imkanları, eyni zamanda, istifadə etdiyi metodlar onun mahiyyətindən, tarixindən irəli gəlir. Çox təəssüf ki, Ermənistanın birbaşa alət edilərək Azərbaycana qarşı humanitar böhran şousu adı altında həyata keçirilən bu səhnələşdirilmiş layihə birbaşa olaraq Fransanın beyin mərkəzlərində hazırlanıb, ölkəmizə və bölgə xalqlarına qarşı yönəlib. Əfsuslar olsun ki, ölkə daxilində rəhbərlik etdiyi şəhərin təsərrüfatının qurulmasına yönəlik fəaliyyət göstərmək vəzifəsi daşıyan Fransanın şəhər merlərinin ölkənin xarici siyasətinə kobud şəkildə müdaxilə etməsi, eyni zamanda, bu fəaliyyəti ilə müstəqil bir dövlətin daxili işlərinə müdaxiləsi beynəlxalq hüququn prinsiplərinə ziddiyyət təşkil edir. Bu fəaliyyət açıq şəkildə sübut edir ki, bəli, bu şouların arxasında Fransa dövləti, siyasiləri dayanır. Burada əsas hədəf zəiflədilən Fransanın neoimperialist maraqlarının təmin edilməsidir. Fransa şəhərlərinin merləri özlərinin rəhbəri olduğu şəhərlərin üzləşdikləri acınacaqlı vəziyyəti, təsərrüfat həyatının, ictimai nəqliyyat sisteminin, eyni zamanda, təmizlik sisteminin qurulmasına yönəlik fəaliyyət göstərmək əvəzinə populizmə və erməni diaspor təşkilatlarının maliyyəsindən asılılığa əsaslanan belə davranışları ilə bu ölkənin az da olsa qalmış imicinə ciddi zərbə vururlar. Onlar bilməlidirlər ki, bu cür fəaliyyətlə Cənubi Qafqazdakı proseslərə təsiretmə mexanizmi formalaşdıra və hər hansı nəticə əldə edə bilməzlər. Azərbaycanın ortaya qoyduğu iradə haqlı və ədalətli olmaqla yanaşı, həm də beynəlxalq hüquq prinsiplərinə əsaslanır. Biz qalib olmağımızla yanaşı, həm də haqlıyıq. Beynəlxalq hüququn ümumi qəbul edilmiş prinsiplərinə əsaslanırıq və ona görə də qanunsuz təzyiqlərlə Azərbaycanı haqlı bildiyi yoldan çəkindirmək döndərmək mümkün deyil.
“Hesab edirəm ki, Azərbaycan müttəfiqləri, dostları ilə birgə Cənubi Qafqazda yeni şərtlər, yeni reallıqlar formalaşdırmağa çalışan kənar güclərin təsir imkanlarını bundan sonra da zəiflədəcək, onların qurmaq istədiyi planlara zərbələr vuracaq və heç bir halda qaranlıq, çirkin planların həyata keçirilməsinə imkan verilməyəcək. Bu gün baş verən hadisələr, xüsusilə də Fransa kimi dövlətlərin ortaya qoyduqları oyunlar, planlar Ermənistanı və Qarabağdakı separatçıları növbəti qurbana, hədəfə çevirir. Çox istərdim ki, Ermənistan cəmiyyəti və Qarabağdakı dinc erməni sakinlər bu prosesə ayıq başla yanaşsınlar və onlar Fransa kimi dövlətlərin əlinin altında alət olmağın onlar üçün hansı nəticələr doğuracağını bir daha dərindən düşünsünlər, buna uyğun adekvat nəticə çıxarıb, uyğun davranışlar nümayiş etdirsinlər. Əks halda 44 günlük Vətən müharibəsində, ötən il sentyabrın 12-14-də olduğu kimi yenə də zərərçəkən tərəf Ermənistan dövləti, xalqı və Qarabağdakı separatçı qüvvələr olacaq. Azərbaycan öz sərhədləri daxilində hər hansı separatçı rejimin və ya oyuncaq qurumun mövcudluğunu qəbul etmir və etməyəcək. Belə bir oyuncaq qurum yaratmaq istəyənlər isə yalnız öz ərazilərində, dövlətlərinin sərhədləri daxilində bu planları həyata keçirə bilərlər. Azərbaycan isə bu istiqamətdə həmin dövlətlərə dəstək verməyə hazırdır”, - deyə Anar Əliyev qeyd edib.
Bölmənin digər xəbərləri
