Qlobal çağırışlara milli baxış: COP uğurundan WUF 2026-ya - ŞƏRH
Bakı, 25 dekabr, AZƏRTAC
2026-cı ilin 17–22 may tarixlərində Bakı daha bir mühüm qlobal platformaya – Ümumdünya Şəhər Forumuna (WUF) ev sahibliyi edəcək. “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusunda keçiriləcək qlobal əhəmiyyətli tədbir Azərbaycanın beynəlxalq nüfuzunun, xüsusilə dayanıqlı inkişaf və şəhərsalma sahəsində artan rolunun məntiqi davamıdır. Bu tədbirin Bakıda keçirilməsi təsadüfi deyil və son illərdə ölkəmizin qazandığı çoxşaxəli beynəlxalq təcrübənin nəticəsidir.
Azərbaycan artıq uzun müddətdir ki, qlobal miqyaslı tədbirlərin keçirildiyi etibarlı mərkəz kimi tanınır. Bakı daha əvvəl BMT Sivilizasiyalar Alyansının Qlobal Forumu, Avropa Oyunları, İslam Həmrəyliyi Oyunları, Qoşulmama Hərəkatının Zirvə Görüşü, Dünya Dini Liderlərinin Sammiti kimi mötəbər tədbirlərə uğurla ev sahibliyi edib. Bu tədbirlər təkcə təşkilati baxımdan deyil, həm də siyasi, humanitar və intellektual məzmununa görə beynəlxalq aləmdə yüksək qiymətləndirilib.
Bu fikirləri AZƏRTAC-a açıqlamasında Sosial Tədqiqatlar Mərkəzinin əməkdaşı, politoloq Kazım Kazımov söyləyib.
K.Kazımov bildirib ki, xüsusilə COP çərçivəsində Bakının nümayiş etdirdiyi performans Azərbaycanın qlobal proseslərdə məsuliyyətli və təşəbbüskar aktor kimi mövqeyini daha da möhkəmləndirdi. COP zamanı yaradılan açıq dialoq mühiti, inkişaf etmiş və inkişaf etməkdə olan ölkələr arasında körpü rolunun oynanılması, iqlim ədaləti və maliyyələşmə məsələlərinin gündəmdə saxlanılması dünya ictimaiyyətində geniş rezonans doğurdu. Beynəlxalq media orqanlarında, analitik mərkəzlərin hesabatlarında və ekspert müzakirələrində Bakının COP-a verdiyi töhfələr xüsusi vurğulandı.
Onun sözlərinə görə, COP-un uğurla keçirilməsi bir daha sübut etdi ki, Azərbaycan qlobal çağırışlara yalnız ev sahibliyi edən ölkə kimi deyil, həm də fəal fikir və təşəbbüs mərkəzi kimi yanaşır: “Bu yanaşmanın arxasında isə Prezident İlham Əliyevin siyasi iradəsi, strateji baxışı və beynəlxalq əməkdaşlığa verdiyi önəm dayanır. Dövlət başçısının rəhbərliyi ilə Azərbaycan multilateralizmə, dialoqa və qarşılıqlı hörmətə əsaslanan xarici siyasət xəttini ardıcıl şəkildə həyata keçirir.
Prezident İlham Əliyevin COP çərçivəsində səsləndirdiyi mesajlar – qlobal məsuliyyətin bölüşdürülməsi, inkişaf etməkdə olan ölkələrin maraqlarının nəzərə alınması, enerji keçidinin ədalətli şəkildə həyata keçirilməsi – beynəlxalq ictimaiyyət tərəfindən diqqətlə qarşılandı. Bu mövqelər Azərbaycanın təkcə regional deyil, qlobal problemlərə dair düşünən və həll yolları təklif edən dövlət olduğunu nümayiş etdirdi”.
Politoloq bildirib ki, Azərbaycan Respublikasında 2026-cı ilin “Şəhərsalma və Memarlıq İli” elan edilməsi haqqında Azərbaycan Respublikası Prezidentinin müvafiq Sərəncamı da uğurlu siyasi paralellik aparmaqdır. Beləcə, 2026-cı il həm respublikamız həm də beynəlxalq aləm üçün şəhərsalma və memarlığa mühüm töhfə ili olacaq. Məhz bu kontekstdə Ümumdünya Şəhər Forumunun Bakıda keçirilməsi xüsusi əhəmiyyət daşıyır. Şəhərsalma, təhlükəsiz və dayanıqlı yaşayış məkanlarının yaradılması XXI əsrin əsas qlobal çağırışlarındandır. Urbanizasiya proseslərinin sürətlənməsi, iqlim dəyişikliklərinin şəhərlərə təsiri, sosial bərabərsizlik və infrastruktur problemləri WUF kimi platformalarda kompleks şəkildə müzakirə olunmalıdır.
“Bakı Forumu çərçivəsində şəhərlərin gələcəyi ilə bağlı qlobal baxışların formalaşdırılması, innovativ həllərin paylaşılması və praktiki əməkdaşlıq mexanizmlərinin gücləndirilməsi gözlənilir. Azərbaycan üçün bu Forum həm də milli şəhərsalma təcrübəsinin, azad edilmiş ərazilərdə “ağıllı şəhər” və “ağıllı kənd” konsepsiyalarının beynəlxalq auditoriyaya təqdim olunması baxımından mühüm fürsətdir.
COP təcrübəsi açıq şəkildə göstərdi ki, Azərbaycan böyük miqyaslı beynəlxalq tədbirləri yüksək peşəkarlıqla təşkil etmək imkanına malikdir. Bu səbəbdən “COP-u uğurla keçirdiyimiz kimi, WUF da uğurlu olacaq” fikri sadəcə optimist yanaşma deyil, real təcrübəyə əsaslanan qənaətdir”, - deyə o əlavə edib.
Sosial Tədqiqatlar Mərkəzinin əməkdaşı vurğulayıb ki, WUF 2026 Bakını qlobal şəhərsalma diskursunun əsas mərkəzlərindən birinə çevirəcək, dayanıqlı inkişaf məqsədlərinə töhfə verən ideyaların formalaşmasına və beynəlxalq tərəfdaşlığın daha da dərinləşməsinə xidmət edəcək. Azərbaycanın açıq dialoqa, çoxtərəfli əməkdaşlığa və qlobal məsuliyyətə sadiqliyi bu Forumda da aydın şəkildə öz əksini tapacaq.
Bölmənin digər xəbərləri
