MİNGƏÇEVİRƏ SƏRNİŞİN QATARI İŞLƏYİR
Bakıdan Mingəçevirə sərnişin qatarı işləməyə başlamışdır. Bu münasibətlə Mingəçevirdə ümumşəhər mitinqi keçirilmişdir. İcra hakimiyyətinin başçısı Məhəbbət Qarabağlı, Azərbaycan Dövlət dəmir Yolunun rəisi Ziya Məmmədov, Milli Məclisin deputatları Zəlimxan Yaqub, Aydın Mirzəzadə, İbrahim İsayev, Elton Məmmədov, ictimaiyyətin nümayəndələri mitinqdə çıxış etmişlər.
Natiqlər bildirmişlər ki, energetiklər şəhərinin salındığı 53 il ərzində mingəçevirlılər həmişə dəmir yolu nəqliyyatının xidmətindən istifadə etməyi arzulamışlar. Nəhayət, bu arzu Azərbaycan Prezidenti Heydər Əliyevin şəxsi göstərişi və qayğısı ilə reallaşmışdır. Azərbaycan Dövlət Dəmir Yolu qısa müddətdə Mingəçevirdə hər cür şəraiti olan geniş vağzal binası inşa etmiş, müasir tələblərə cavab verən rahat, vaqonlardan ibarət sürət qatarı marşrutu açmışdır. Mingəçeviri ölkəmizin paytaxtı ilə birləşdirən bu marşrutdan respublikanın şimal-qərb bölgəsinin əhalisi də istifadə edə biləcəkdir.
Mitinqdə çıxış edənlər Azərbaycan Prezidentinin müstəqil dövlətimizin möhkəmləndirilməsi, xalqımızın rifahının yüksəlməsi naminə apardığı məqsədyönlü siyasəti yüksək qiymətləndirmiş, onu daim müdafiə edəcəklərini bildirmişlər.
Mitinq iştirakçıları adından Azərbaycan Prezidenti Heydər Əliyevə müraciət qəbul olunmuşdur.
Bakıdan yola salınmış “Ana Kür” sərnişin qatarı şən musiqi sədaları altında Mingəçevir vağzalına yan almışdır. Bu əlamətdar hadisə münasibətilə qurban kəsilmişdir.
Sonra mitinq iştirakçıları Şəhidlər xiyabanını ziyarət etmiş, azərbaycanlıların soyqırımı və deportasiyası abidə kompleksinin önünə əklillər qoymuşlar.
Bölmənin digər xəbərləri
