Daşqınlar artacaqdır
Bakı, 14 noyabr (AZƏRTAC). Ümumdünya Bankında belə hesab edirlər ki, iqlim dəyişiklikləri Cənub-Şərqi Asiyada ekstremal hava şəraitinə və daşqınlara səbəb olacaqdır.
Ümumdünya Bankının iqlim dəyişiklikləri məsələləri üzrə xüsusi nümayəndəsi Endrü Stir Hanoya (Vyetnam) səfəri zamanı demişdir ki, artıq bu gün regionda getdikcə daha güclü və aramsız yağışlar yağır, çox tez-tez daşqınlar olur, ekstremal hava şəraiti yaranır, havanın temperaturu yüksəlir. Buna səbəb qlobal iqlim dəyişiklikləri prosesidir. Stirin sözlərinə görə, gələcəkdə vəziyyət daha da ağırlaşacaqdır.
İqlim dəyişikliklərini “ətraf mühitin vəziyyətinin ən təxirəsalınmaz problemi” adlandıran BMT mütəxəssisləri bu fikirdə onunla həmrəydirlər.
Bir neçə fakt göstərək. Tailandda bir neçə ay davam edən yağışlar nəticəsində son yarım əsrdə görünməmiş güclü daşqın artıq 500 nəfərin məhvinə səbəb olmuş, ölkədə milyonlarla evi dağıtmışdır. Zərərçəkənlərin sayı yüz minlərlədir. İqtisadi itkilər bir neçə milyard dollara çatmışdır və artmaqda davam edir.
Qonşu Kambocada 2000-ci ildən bəri azı 247 adam güclü daşqınların qurbanı olmuşdur. Vyetnamda yüzdən çox adam suda həlak olmuşdur: qurbanların çoxu ölkənin cənubunda, Mekonq çayı deltasında yaşayırdı.
Bölmənin digər xəbərləri
