VİKTOR YUŞŞENKO UKRAYNADA ANTİSEMİTİZMLƏ MÜBARİZƏ APARACAQ

29.12.2005 [21:53]
Çap et
A⁺ A^-

AZƏRTAC Nyusru İsraeı saytına istinadla xəbər verir ki, Ukrayna Prezidenti Viktor Yuşşenko gələn ilin əvvəllərində İsrailə səfər etməyi planlaşdırır. O, Müqəddəs torpağı ziyarət etmək niyyətində olduğunu özü bildirmişdir. Dövlət başçısı səfərin dəqiq tarixini açıqlamasa da, təkcə bunu demişdir ki, bu səfər ərəfəsində dağlara gedib, xizək sürmək istəyir.

Ukrayna Prezidenti bu bəyanatı Kiyevin baş sinaqoqundakı mərasimdə vermişdir. O, yəhudi icmasının nümayəndələrinə müraciətində bildirmişdir ki, ölkədə antisemitizm təzahürlərinə qarşı tədbirlər görəcəkdir.

Ukrayna və İsrail XİN-ləri bu xəbəri hələlik şərh etməmişlər. Lakin qeyri-rəsmi mənbələrin məlumatına görə, səfər təxminən fevralın axırları üçün nəzərdə tutulmuşdur.

Xatırladaq ki, Ukraynada antisemitizm hallarının artması ilə əlaqədar İsraildə dərin narahatlıq hissi dəfələrlə ifadə olunmuşdur.