Ulu Öndər Heydər Əliyevin Prezident seçilməsi müstəqil Azərbaycanın tarixində yeni mərhələ yaratdı ŞƏRH
Bakı, 3 oktyabr, AZƏRTAC
Xalqımızın Ümummilli Lideri Heydər Əliyevin siyasi fəaliyyəti ilə bağlı olan hər bir əlamətdar hadisənin və tarixi günün Azərbaycanın müasir dövlətçilik tarixində xüsusi yeri, mühüm əhəmiyyəti var. Çünki Ulu Öndərin zəngin siyasi fəaliyyətinin ayrı-ayrı mərhələləri və onun adı ilə bağlı tarixi hadisələr Azərbaycanın taleyində mühüm dönüş nöqtələri kimi yadda qalıb. Bu hadisələrin hər biri həm sovet, həm də müstəqillik illərində Azərbaycanın tarixində yeni mərhələnin əsasını qoyub. Ona görə 14 iyul, 15 iyun kimi tarixlər respublika ictimaiyyəti tərəfindən hər zaman böyük minnətdarlıqla xatırlanır və qeyd olunur.
Bu sözləri AZƏRTAC-a açıqlamasında Milli Məclisin deputatı Xanlar Fətiyev deyib.
O bildirib ki, Ulu Öndər Heydər Əliyevin ilk dəfə Azərbaycan Prezidenti seçildiyi 1993-cü il oktyabrın 3-ü də ən əlamətdar günlərdən biri kimi müasir dövlətçilik tariximizdə xüsusi yer tutur. Məhz həmin tarixdən etibarən Ümummilli Lider Heydər Əliyevin rəhbərliyi ilə Azərbaycanda müstəqilliyin etibarlı təməllərinin yaradılmasına, sosial-iqtisadi tənəzzülün aradan qaldırılmasına, hüquqi, dünyəvi və demokratik dövlət quruculuğuna xidmət edən islahatların həyata keçirilməsinə başlanıldı.
Deputat qeyd edib ki, Ümummilli Lider Heydər Əliyevin 33 il əvvəl Azərbaycan Prezidenti seçilməsi Ulu Öndərə olan ümumxalq inamının və etimadının seçki yolu ilə təsdiqi idi. Bundan bir neçə ay əvvəl Ulu Öndər Heydər Əliyev xalqın təkidli istək və arzusu ilə Naxçıvandan Bakıya gəlmiş, respublikamızı məhvə aparan siyasi-hərbi proseslərin qarşısını müdrikliyi, dühası və iradəsi ilə almış, anti-Azərbaycan dairələrin planlarını iflasa uğratmışdı. 1993-cü il iyunun 15-də Azərbaycan Ali Sovetinin Sədri seçilən Ümummilli Lider Heydər Əliyevin qısa müddətdə həyata keçirdiyi tədbirlər göstərirdi ki, qətiyyətli və güclü liderin rəhbərliyi ilə mürəkkəb siyasi-hərbi gərginliyə son qoymaq, sabitliyi təmin etmək, dövlət idarəçiliyini möhkəmləndirmək və Azərbaycanın gələcək inkişafının möhkəm təməlini yaratmaq mümkündür. Ona görə 1993-cü ilin oktyabrına təyin olunan prezident seçkilərində də xalqın namizədi Ümummilli Lider Heydər Əliyev idi. Seçki günü səsvermənin nəticələri də bunu təsdiq etdi.
Heydər Əliyevin Prezident seçilməsi xalqın iradəsinin və etimadının ifadəsi idi
“1993-cü il oktyabrın 3-də keçirilən prezident seçkiləri həm də müstəqil Azərbaycanın ilk demokratik seçkisi kimi tarixə düşdü və bununla da respublikamızda azad, ədalətli və şəffaf seçkilərin keçirilməsinin əsası qoyuldu. Bu mənada həmin seçki xalqımız üçün mühüm tarixi hadisə, eyni zamanda, inkişafa və güclü Azərbaycan dövlətçiliyinə gedən yolun ilk siyasi pilləsi idi. Artıq 1993-cü ilin payızından etibarən Azərbaycanda cərəyan edən bütün proseslər ölkəmizə güclü siyasi Liderin rəhbərlik etməsindən xəbər verirdi. O zaman Ulu Öndərin həyata keçirdiyi ilk təxirəsalınmaz tədbirlərdən biri vahid komandanlığa əsaslanan Azərbaycan Ordusunun yaradılması oldu. Məhz bunun sayəsində nəinki Ermənistanın daha da təcavüzkar planlarının qarşısı alındı, o cümlədən cəbhənin müxtəlif istiqamətlərində torpaqlarımız işğaldan azad edildi”, - deyə X.Fətiyev vurğulayıb.
O diqqətə çatdırıb ki, Ulu Öndərin o zaman atdığı digər təxirəsalınmaz addım ölkədə sabitliyin bərqərar edilməsi oldu. Cəmiyyətdə qorxu və xof yaradan qanunsuz silahlı dəstələrin ləğv edilməsi, kriminogen vəziyyətin nəzarət altına alınması, dövləti cinayətlərdə əli olan şəxslərin hüquqi məsuliyyətə cəlb olunması ilə insanlar rahat nəfəs aldılar. 1994-cü ildə cəbhədə atəşkəsin elan olunması qarşıda duran ümummilli vəzifələrin daha sürətlə həyata keçirilməsinə əlverişli şərait formalaşdırdı. 1994-cü ilin sentyabrında Bakıda dünyanın tanınmış neft şirkətləri ilə “Əsrin müqaviləsi”nin imzalanması, hüquqi, iqtisadi, sosial və aqrar islahatların həyata keçirilməsinə başlanılması, milli həmrəyliyin təmin olunması, xalqımızın azərbaycançılıq ideyası ətrafında birləşməsi, bütün sahələrdə tərəqqiyə doğru dönüşün baş verməsi, respublikamızın beynəlxalq əlaqələrinin yaradılması, xarici siyasət kursunun müəyyən edilməsi Azərbaycanın artıq müstəqil dövlət kimi inkişaf yoluna qədəm qoyduğunu göstərirdi.
“Ulu Öndər Heydər Əliyevin yaratdığı Azərbaycan Ulu Öndərin siyasi kursunu uğurla davam etdirən Prezident İlham Əliyevin rəhbərliyi ilə ötən 23 ildə böyük inkişaf yolu keçərək tarixinin ən qüdrətli dövləti səviyyəsinə yüksəlib. Bu dövrdə respublikamızın qarşısında dayanan bütün milli vəzifələr layiqincə icra olunub. Prezident İlham Əliyevin rəhbərliyi ilə ötən dövrdə Azərbaycanın qazandığı ən böyük tarixi uğurlar isə, əlbəttə ki, torpaqlarımızın işğaldan azad edilməsi, ərazi bütövlüyümüzün bərpa olunmasıdır. Bütün bunlar həm də Ulu Öndər Heydər Əliyevin ideyalarının təntənəsinin, arzularının real həyata vəsiqə almasının möhtəşəm təcəssümüdür”, - deyə Milli Məclisin deputatı əlavə edib.
Bölmənin digər xəbərləri
