ŞRİ-LANKADA AVTOBUS PARTLAMIŞDIR
AZƏRTAC Röyter agentliyinə istinadla xəbər verir ki, Şri-Lankanın şimalındakı Vavuniya şəhəri yaxınlığında avtobus fuqasa düşüb partlamış, nəticədə bir hərbi qulluqçu, 4 dinc sakin həlak olmuş, 28 nəfər isə yaralanmışdır.
Polis partlayışda “Tamil İlamın azadlıq pələngləri” (TİAP) qruplaşması yaraqlılarının əli olduğunu güman edir. Lakin TİAP-ın nümayəndələri hələlik hadisəyə görə məsuliyyəti öz üzərlərinə götürməmişlər.
Tamil separatçıları ilə sinqal çoxluğunu təmsil edən Şri-Lanka hökuməti arasında qarşıdurma 1983-cü ildən başlanmışdır. O vaxtdan TİAP yaraqlıları, adanın əsasən, tamillər məskunlaşmış şimal və şərq hissələrində “müstəqil dövlət” yaratmaq uğrunda silaha sarılmışlar.
Ötən il və bu ilin əvvəlindən Şri-Lankada toqquşma və terror aktları nəticəsində təxminən üç minədək mülki şəxs, hərbi qulluqçu və separatçı həlak olmuşdur.
Bölmənin digər xəbərləri
