SON MƏNZİLƏ
Mərhumun cənazəsi Azərbaycan Dövlət Musiqili Komediya Teatrının matəmsayağı bəzədilmiş səhnəsində postament üzərində qoyulmuşdu. Postamentin qarşısına unudulmaz sənətkarın 60 illik yaradıcılığı dövründə aldığı orden və medallar, ətrafına isə Azərbaycan Prezidenti İlham Əliyevin, Mədəniyyət Nazirliyinin və müxtəlif təşkilatların adından əklillər düzülmüşdü.
Salonda həzin matəm müsiqisi səslənirdi. Milli Məclisin deputatları, elm, incəsənət və mədəniyyət xadimləri cənazənin yanında fəxri qarovulda dayanırdılar.
Matəm mərasimini mədəniyyət naziri Polad Bülbüloğlu açaraq mərhumun həyat və yaradıcılığından, yaratdığı parlaq və dolğun obrazlardan söz açdı. O, ümummilli liderimiz Heydər Əliyevin vaxtilə bütün sənətkarlara göstərdiyi diqqət və qayğısından danışaraq, onun Zəroş Həmzəyeva ilə görüşlərini xatırlatdı. Bildirdi ki, 1925-ci il martın 22-də NMR-in Babək rayonunun Nehrəm kəndində dünyaya göz açan Zəroş Həmzəyevanın uğurları Cəlil Məmmədquluzadə adına Naxçıvan Dövlət Musiqili Dram Teatrının səhnəsindən başlamışdır. O, 1956-cı ildə Azərbaycanın əməkdar, 1967-ci ildə isə xalq artisti adlarına layiq görülmüşdür.
Teatr Xadimləri İttifaqının sədri, xalq artisti Azər Paşa Nemətov, Dövlət Musiqili Komediya Teatrının direktoru, xalq artisti Hacıbaba Bağırov, xalq artisti Səyavuş Aslan, Qadın Problemləri üzrə Dövlət Komitəsinin sədri Zəhra Quliyeva, Milli Məclisin deputatı Eldar İbrahimov, Azərbaycan Dövlət Milli Dram Teatrının direktoru, xalq artisti Əlabbas Qədirov zəngin obrazlar yaratmış sənətkara Allahdan rəhmət diləyərək bildirdilər ki, Zəroş Həmzəyeva 60 illik səhnə fəaliyyəti dövründə milli teatr tarixinin böyük sənətkar nəslinin yaradıcılıq ənənələrinə sadiq qalmış, bütün səhnə fəaliyyəti boyu yüksək peşəkarlıq, müasirlərin mənəvi aləminə dərindən nüfuz edə bilmək bacarığı nümayiş etdirmişdir.
Natiqlər xüsusi vurğuladılar ki, Zəroş xanım Həmzəyevanın yaradıcılığı gənc nəslin milli–mənəvi dəyərlərə bağlılıq ruhunda tərbiyə olunması baxımından böyük əhəmiyyətə malikdir. O, eyni zamanda ölkəmizin ictimai-siyasi həyatında daim vətəndaşlıq mövqeyi nümayiş etdirmişdir. Zəroş xanım uzun müddət Naxçıvan Qadınlar Şurasının sədri vəzifəsində çalışmış, deputat kimi fəal iş aparmışdır.
Matəm mərasimində çıxış edənlər Zəroş xanımın yüksək insani keyfiyyətlərindən danışıb, milli teatrımızın inkişafına çalışmış mərhum aktrisamızın xidmətlərinin həmişə yüksək qiymətləndirildiyini, orden və medallarla, o cümlədən ali mükafat - “Şöhrət” ordeni ilə təltif olunduğunu vurğuladılar.
Mərhumun oğlu Nizami Həmzəyev matəm mərasimində çıxış edərək teatr sənətinin inkişafında anasının xidmətlərinə verdiyi yüksək qiymətə, xatirəsinə göstərdiyi hörmət və ehtirama görə Azərbaycan Prezidenti İlham Əliyevə dərin minnətdarlığını bildirdi. O, bütün mərasim iştirakçılarına təşəkkür etdi.
Mərasimdə Prezident Administrasiyasının rəhbəri Ramiz Mehdiyev, Bakı Şəhər İcra Hakimiyyətinin başçısı Hacıbala Abutalıbov, daxili işlər naziri general-polkovnik Ramil Usubov və digər rəsmi şəxslər iştirak edirdilər.
X X X
Xalq artisti Zəroş Həmzəyevanın cənazəsi teatrın binasından qaldırılaraq 2-ci Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində əbədi yaşayacaq tanınmış sənətkar, əsl vətəndaş və qayğıkeş insan Zəroş Mirzəbağır qızı Həmzəyevanın cənazəsi doğma torpağa tapşırıldı. Məzarının üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
