RUSİYALI CİNAYƏTKAR ŞƏKİDƏ YAXALANMIŞDIR
Daxili İşlər Nazirliyinin mətbuat xidmətindən AZƏRTAC-ın müxbirinə bildirmişlər ki, iki gün əvvəl Rusiyanın sərhəd qoşunlarının əsgəri iki yoldaşını öldürmüş, birini isə yaralayaraq qaçmışdır. Bu barədə Azərbaycan tərəfinə müvafiq məlumat verildikdən sonra respublikamızın Rusiya ilə sərhəd zolağına nəzarəti gücləndirilmişdir. Polis əməkdaşları Şəkinin Şin kəndi ərazisində şübhəli bir nəfəri saxlamışlar. Məlum olmuşdur ki, bu, Rusiya vətəndaşı, 1985-ci il təvəllüdlü Ustavo Vladislav Aleksandroviçdir. O etiraf edib ki, iki əsgəri öldürmüş, birini isə yaralamışdır. Polis əməkdaşları onun üzərindən bir fişəng atan tapança, 8 ədəd patron tapmışlar. Hazırda onun Rusiyaya ekstradisiya edilməsi üçün müvafiq sənədləşdirmələr aparılır.
