RUSİYADA 70 MİN QIRXIQBAŞ VAR
AZƏRTAC “İnterfaks” agentliyinə istinadla xəbər verir ki, Rusiya hüquq müdafiəçiləri davakar millətçilərin - skinhedlərin sayının dəhşətli dərəcədə artdığını həyəcanla bildirirlər. Onların fikrincə, əgər iki il əvvəl Rusiyada 50 min qırxıqbaş vardısa, hazırda bu rəqəm 70 mini keçmişdir.
Moskva İnsan Hüquqları Bürosunun (MİHB) direktoru Aleksandr Brodanın sözlərinə görə, Rusiya şəhərlərində radikal millətçi təşkilatların keçirdikləri kütləvi aksiyalarda millətlərarası ədavəti qızışdıran şüarlar söylənilir. Qırxıqbaşların qətlə yetirdikləri insanların sayı artır. Təkcə cari ilin yanvar-aprel aylarında ölkədə irqçilərin 80 basqını nəticəsində 25 adam öldürülmüş və 80 nəfər yaralanmışdır. Həmin dövrdə məhkəmələr milli nifrət zəminində cinayətlərə görə 21 ittiham hökmü çıxarmışlar.
Lakin digər məlumata görə, Rusiyada ötən dörd ayda milli nifrət və ksenofobiya (gəlmələrə nifrət) zəminində 200-dək basqın olmuş və bu zaman 25 adam öldürülmüş, 154 nəfərə xəsarət yetirilmişdir.
Bölmənin digər xəbərləri
