ROMA PAPASINA PLÜŞ AYI BAĞIŞLAMIŞLAR
AZƏRTAC xarici KİV-lərə istinadla xəbər verir ki, XVI Benedikt 80 illiyi günündə, adətən, pontifikə bağışlanan çoxlu ənənəvi hədiyyə almışdır. Hətta yubiley şərəfinə klassik musiqi konserti də verilmişdir. Lakin hədiyyələrin içində nə yüksək rütbəsinə, nə də Roma-katolik kilsəsi başçının yaşına uyğun olmayan qeyri-adi hədiyyə də vardı.
Bu qeyri-adi hədiyyə çox iri plüş ayı idi. Papanın katibi monsenyor Georq Hansvayn bildirmişdir ki, ayını naməlum italiyalı göndərmişdir. Papa oyuncağı Romanın “Bambino Gesu” (Körpə İsa) uşaq xəstəxanasına göndərmiş və artıq klinikadan balaca xəstələrdən təşəkkür məktubu almışdır.
Pontifik Ştutqart orkestrinin onun şərəfinə verdiyi klassik musiqi konsertindən son dərəcə məmnun qalmışdır. Özü mahir pianoçu olan Papa konsertdə Motsartın, Dvorjakın və XVI əsr italiyalı bəstəkar Covanni Qabrielinin musiqisini dinləməkdən böyük həzz almışdır.
Bölmənin digər xəbərləri
