PENTAQON ETİRAF EDİR
AZƏRTAC-ın İTAR-TASS-dan aldığı xəbərə görə, Pentaqon ilk dəfə etiraf etmişdir ki, İraqda zorakılığın bəzi təzahürlərini “vətəndaş müharibəsi” kimi səciyyələndirmək olar. Nazirliyin İraqdakı vəziyyət haqqında rüblük hesabatında vurğulanır ki, ötən ilin oktyabr-dekabr aylarında koalisiya qüvvələrinə və mülki şəxslərə hücumlar rekord həddə çatmışdır.
Belə ki, yaraqlılar Bağdadda gün ərzində 45 dəfə, Ənbar, Diyala və Səlahəddin əyalətlərində isə gündə 70 dəfə hücuma keçmişlər. Bütövlükdə ölkədə isə hesabat dövründə həftədə mindən çox hücum qeydə alınmışdır. Məruzədə həlak olanların sayı açıqlanmır, lakin göstərilir ki, ekstremistlərin fəaliyyəti, əsasən, koalisiya qüvvələrinə yönəldilsə də, terror aktlarından daha çox iraqlıların özləri əziyyət çəkmişlər.
Buş hökuməti İraqdakı vəziyyəti qiymətləndirərkən “vətəndaş müharibəsi” terminini işlətməməyə çalışır. Məruzədə göstərilir ki, həmin termin münaqişənin mürəkkəbliyini tam əks etdirmir. Hesabatın tərtibçiləri əlavə etmişlər ki, İraqda vəziyyətin bəzi elementləri vətəndaş müharibəsi, o cümlədən cəmiyyətin etnik və konfessional əlamətlərə görə getdikcə təbəqələşməsi, zorakılığın və əhalinin yerdəyişməsinin xarakterinin başqa şəkil alması anlayışına müvafiqdir.
Məruzədə bildirilir ki, iraqlıların fikrincə, ölkədə vəziyyət getdikcə daha da pisləşəcəkdir, buna görə də hər ay ölkəni azı 9 min nəfər tərk edir.
ABŞ 2003-cü ilin martında İraqda müharibəyə başlayandan bəri 3,2 min hərbi quluqçusunu itirmiş, 24 min amerikalı yaralanmışdır.
Bölmənin digər xəbərləri
