Oktyabrın 15-də Milli Olimpiya Komitəsinin prezidenti, Milli Məclisin deputatı İlham Əliyev bu ilin sentyabrında yunan-roma güləşi üzrə Moskvada keçirilmiş dünya çempionatında ikinci yeri tutmuş Fərid Mansurov, onun məşqçisi Əliqulu Həsənoğlu, bu idman növü üzrə yığma komandamızın məşqçisi Elçin Cəfərov və respublika Güləş Federasiyasının prezidenti Abbas Abbasov ilə görüşmüşdür. 

İLHAM ƏLİYEV görüş iştirakçılarına müraciətlə dedi:

- Əziz dostlar, mən sizi növbəti qələbə münasibətilə təbrik etmək istəyirəm. Bu yaxınlarda Moskvada yunan-roma güləşi üzrə dünya çempionatı keçirilmişdir və orada bizim gənc idmançımız Fərid Mansurov gümüş medala layiq görülmüşdür. Bu, çox böyük uğurdur. Səhv etmirəmsə, bizdə son dəfə yunan-roma güləşi üzrə dünya çempionatında medal 1994-cü ildə qazanılmışdır. O vaxtdan sonra o qədər də böyük uğurlarımız olmayıbdır. Ona görə çox sevindirici haldır ki, olimpiya oyunlarına iki il qalmış bu idman növündə də gözəl nəticə var, uğur var.

Nəzərə alsaq ki, Fərid gəncdir, 20 yaşı var, onda deməyə əsas var ki, gələcəkdə hələ uzun illər ərzində Azərbaycanı, güləş məktəbimizi dünya miqyasında ləyaqətlə təmsil edəcəkdir. Əlbəttə, arzumuz odur ki, olimpiya oyunlarına vəsiqə qazansın və orada indikindən aşağı olmayan bir nəticə göstərsin. Mən buna əminəm.

Azərbaycanda güləş milli, ənənəvi idman növüdür. Bizim güləşçilərimiz beynəlxalq yarışlarda daim yaxşı nəticələr göstərmişlər. Çox sevindirici haldır ki, sərbəst güləş üzrə Avropa çempionatı bu yaxınlarda Bakıda keçirildi və idmançılarımız gözəl nəticələr göstərdilər. Bu onu göstərir ki, Azərbaycanda idman inkişaf edir, beynəlxalq idman qurumları bizə inamla yanaşırlar. Belə bir mötəbər yarışın Azərbaycanda keçirilməsi, əlbəttə, bu inamın təzahürüdür, nəticəsidir.

Güləş Federasiyasında işlər çox yaxşı gedir. Mən buna çox sevinirəm. Abbas müəllim uzun illərdir federasiyaya rəhbərlik edir. Burada idmanın iki növü birləşir. Buna baxmayaraq, nəticələr də çox gözəldir, deyə bilərəm ki, Azərbaycan idmanında Güləş Federasiyası ən sanballı, ən fəal federasiyalardan biridir. Təsüdüfi deyil ki, bizim olimpiya medallarımızın birini də məhz güləşçimiz qazanıbdır. Avropa çempionatının üç medalı güləşdə qazanılıbdır. Bu dəfə də dünya çempionatının gümüş medalı qazanılıbdır. Mən əminəm ki, Abbas müəllimin rəhbərliyi altında federasiya, idmançılar, məşqçilər gələcəkdə də öz işlərinə böyük məsuliyyətlə yanaşacaqlar, Azərbaycanın idman ictimaiyyətini, azarkeşləri, bütün xalqımızı növbəti uğurlarla sevindirəcəklər. Mən sizi - Abbas müəllimi, Fəridi, yığma komandamızın baş məşqçisini, Fəridin məşqçisini bir daha təbrik edirəm.

Mən bilirəm ki, belə bir mötəbər yarışda medal qazanmaq çətin işdir. Həmişə demişəm, bəzi hallarda rəsmi statistikaya baxanda, yaxud televiziya və qəzet vasitəsilə idman yarışı haqqında məlumatı izləyəndə və görəndə ki, idmançımız qızıl, gümüş medal qazanıb, - xüsusilə indi Azərbaycanda idmanın hər bir növündə böyük uğurlar var, - bizim ictimaiyyət bunu adi qarşılayır, bir növ buna vərdiş edibdir. Amma yarışı canlı şəkildə izləyəndə hər bir insan görür ki, nə qədər böyük zəhmət, fədakarlıq, qəhrəmanlıq tələb olunur. Biz, olimpiya oyunlarını canlı şəkildə izləyən insanlar bunu çox gözəl bilirik. Bilirəm ki, dünya cempionatında da rəqabət çox böyük idi, Fəridin çəki dərəcəsində idmançılar da çox güclü idi. Buna baxmayaraq, o, ölkəmizi ləyaqətlə təmsil edibdir. Sizi bir də təbrik edirəm.

Güləş Federasiyasının prezidenti ABBAS ABBASOV Milli Olimpiya Komitəsinin 10 illik yubileyi münasibətilə İlham Əliyevi təbrik etdi, son illər ərzində gənclərimizə, idmançılarımıza göstərilən diqqət və qayğıya görə minnətdarlığını bildirdi. O dedi ki, olimpiya oyunlarında, Avropa və dünya çempionatlarında əldə olunmuş nailiyyətlər Prezident Heydər Əliyevin bu sahəyə verdiyi böyük əhəmiyyətin və diqqətin nəticəsidir. Biz idmançılar bunu daim yüksək qiymətləndiririk.

Fərid Mansurov ötən il Özbəkistanda gənclər arasında dünya çempionatının qızıl medalını, bu il isə yaşlılar arasında gümüş medal qazanmışdır. Sərbəst güləş üzrə dünya çempionatında isə olimpiya çempionu Namiq Abdullayev gümüş medala layiq görülmüşdür. Dünya Güləş Federasiyası ilə aparılan danışıqlara əsasən, 2005-ci ildə yaşlılar arasında sərbəst güləş üzrə dünya çempionatı Azərbaycanda keçiriləcəkdir.

Yunan-Roma güləşi üzrə yığma komandanın baş məşqçisi Elçin Cəfərov, dünya çempionatının gümüş mükafatçısı Fərid Mansurov, onun məşqçisi Əliqulu Həsənoğlu idmançılara böyük qayğı göstərdiyinə görə Milli Olimpiya Komitəsinin prezidenti İlham Əliyevə, Gənclər, İdman və Turizm Nazirliyinin və Güləş Federasiyasının rəhbərliyinə təşəkkürlərini bildirdilər, gələcək planları və iştirak edəcəkləri yarışlar barədə ətraflı məlumat verdilər.

MOK-un prezidenti İLHAM ƏLİYEV görüşün sonunda dedi:

- Doğrudan da nazirlik çox böyük gərgin iş aparır və idmanla bağlı tədbirlər keçirir, idmançıların beynəlxalq yarışlarda iştirakını təmin edir. Azərbaycan çox nadir ölkədir ki, Milli Olimpmya Komitəsi ilə Gənclər, İdman və Turizm Nazirliyi arasında həqiqi mənada əməkdaşlıq, dostluq var. Biz çox yaxşı dərk edirik ki, bir amala qulluq edirik. O da Azərbaycan idmanının güclənməsi, idmançılarımızın uğurlu çıxışlarının təmin olunmasıdır.

Bu yaxınlarda qonağımız olan Beynəlxalq Olimpiya Komitəsinin vitse-prezidenti cənab Smirnov da qeyd etdi ki, bir çox ölkələrdə İdman Nazirliyi ilə Olimpiya Komitəsi arasında ziddiyyətlər var. Demək olar ki, əksər ölkələrdə, o cümlədən Rusiyada və başqa ölkələrdə belədir. Azərbaycan yeganə olmasa da, bu iki qurumun əl-ələ verib birgə fəaliyyət göstərdiyi ölkələr çox deyildir. Bu, çox mühüm bir amildir.

Hesab edirəm, idmançılarımızın da uğurları, onlara yaradılan gözəl şərait və onlar tərəfindən bu şəraitdən səmərəli istifadə edilməsi məhz bu amilə, bizim birgə fəaliyyətimizə söykənir. Əlavə etsək ki, bizim federasiyalar da vahid bir komandanın tərkibindədir, çox böyük işlər görürlər, yükün böyük hissəsini üzərilərinə götürürlər, onda demək olar ki, son illər ərzində Azərbaycanda idmanda əldə edilmiş nailiyyətlərin səbəbləri də aydın olur. Məhz bu qarşılıqlı əməkdaşlıq nəticəsində uğurlar əldə etmək mümkün olubdur. Bir tərəfdən, idmana rəhbərlik edən qurumların birgə fəaliyyəti, digər tərəfdən isə, idmançılarımızın gözəl, məsuliyyətli çıxışları bütün bu uğurları təmin edir.

Qeyd olundu ki, 2005-ci ildə Azərbaycanda böyüklər arasında sərbəst güləş üzrə dünya çempionatı keçiriləcəkdir. Bu, çox sevindirici bir xəbərdir. Bilirsiniz ki, Azərbaycanda beynəlxalq yarışların, Avropa və dünya çempionatlarının keçirilməsi, səhv etmirəmsə, 1999-cu ildən başlanıbdır və ilk dəfə yeniyetmələr arasında boks üzrə Avropa çempionatı keçirildi. Ondan sonra bodibildinq, sərbəst güləş, şahmat üzrə və s. yarışlar keçirildi.

Yadımdadır, 1999-cu ildə biz həmin çempionatı keçirəndə çox həyəcanlı idik. Fikirləşirdik ki, biz bunu necə keçirəcəyik. Çünki bizim təcrübəmizdə bu, ilk hal idi. Amma yəqin ki, o yarış da Azərbaycanı beynəlxalq idman ailəsi qarşısında daha yaxşı tanıtdı. Digər federasiyalar bizim xahişimizi nəzərə alıb öz çempionatlarını Azərbaycanda keçirmələri haqqında qərar qəbul etdilər. Bu, çox vacib bir amildir. Hər bir ölkə üçün idmanın inkişafı istiqamətində çox vacib bir amildir. Çünki hər bir belə çempionat, yüksək səviyyəli yarış Azərbayanda idmanı daha da populyarlaşdırır.

Əminəm ki, bu yarışdan sonra idman bölmələrinə axın daha da güclənəcəkdir. Əlbəttə, nəzərə alsaq ki, artıq bizdə gözəl təcrübə var və sərbəst güləş üzrə son Avropa çempionatı bunu göstərdi. Bilirsiniz ki, qonaqlar necə razı idilər. O vaxt demişdilər ki, Azərbaycanda dünya çempionatı da keçirilə bilər. Mən çox şadam ki, onlar belə qərara gəldilər və deyə bilərəm ki, burada sizin də əməyiniz çox böyükdür. Bax bu şəkildə, belə yollarla biz Azərbaycanda idmanı daha da inkişaf etdirə bilərik.

İdmanın bugünkü səviyyəsi də çox yüksəkdir. Yenə də bir neçə gün əvvəl buraya gəlmiş Beynəlxalq Olimpiya Komitəsinin vitse-prezidenti cənab Smirnovun sözlərinə qayıdıram. O demişdir ki, Azərbaycan artıq dünyada aparıcı idman ölkələrinin sırasındadır. Bu, çox böyük bir qiymətdir. Yəqin biz bir neçə il bundan əvvəl bunu heç təsəvvür edə bilmirdik. Amma bu, reallıqdır. Bu reallıq da onu göstərir ki, harada iş var, harada insanlar işə məsuliyyətlə yanaşırlar, orada mütləq nəticə də olacaqdır.

Mən çox şadam ki, bizim idmançılarımız, onların məşqçiləri yaradılmış gözəl şəraitdən istifadə ediblər və ölkəmizi ləyaqətlə təmsil edirlər. Əminəm ki, gələcəkdə də təmsil edəcəklər. Sağ olun.

X X X

Axırda MOK-un prezidenti İlham Əliyev görüş iştirakçıları ilə xatirə şəkli çəkdirdi.

AZƏRTAC

Foto Yaşar Xəlilovundur