MARNEULİ ŞƏHƏRİNDƏ HEYDƏR ƏLİYEV ADINA PARK
AZƏRTAC-ın xüsusi müxbiri xəbər verir ki, Marneuli Rayon İcra Hakimiyyətinin qərarı ilə şəhərdə Azərbaycan xalqının ümummilli lideri Heydər Əliyevin adına park açılmışdır. Rayon icra hakimiyyəti sədrinin müavini Tofiq Hacıyev demişdir: “Azərbaycan Respublikasının Prezidenti İlham Əliyevin Gürcüstana rəsmi səfəri və rayonumuza gəlib yerli əhali ilə görüşməsi Gürcüstan azərbaycanlılarının gələcəyə və özünə inamını artırmışdır. Həmin ərəfədə Tbilisidə ümummilli liderimiz Heydər Əliyevin şərəfinə parkın açılması ölkə iqtidarının, gürcü xalqının dünya miqyaslı siyasətçiyə, Gürcüstanın sadiq dostuna ehtiram nümunəsi idi. Biz də “Mən borçalılar haqqında həmişə düşünmüşəm”, - deyən, harada yaşamalarından asılı olmayaraq bütün azərbaycanlıların ağsaqqalı Heydər Əlirza oğlunun xatirəsini əziz tutub, şəhərin mərkəzindəki ən böyük və qədim parka onun adını verib xatirəsini əbədiləşdirməyi qərara aldıq.
Bütün marneulilər bunu xalqımızın böyük oğlunun el-obamıza qayğısına kiçik hədiyyə sayırlar”.
