Kürdəmirdə ev yanıb
Kürdəmir, 14 yanvar, AZƏRTAC
Kürdəmirdə ikimərtəbəli fərdi yaşayış evi əşyaları ilə birlikdə yanıb. Ev sahibinə ümumilikdə 50 min manata yaxın ziyan dəyib.
AZƏRTAC-ın bölgə müxbiri xəbər verir ki, hadisə səhər saatlarında rayonun Qağacılı kəndində qeydə alınıb. Belə ki, kənd sakini Qarayev Vasif Asif oğluna məxsus ikimərtəbəli 5 otaqlı, ümumi sahəsi 220 kvadratmetr olan ev yanıb. Hadisə yerinə Fövqəladə Hallar Nazirliyinin Kürdəmir rayon dövlət yanğından mühafizə hissəsinin üç yanğınsöndürən maşını və 15 nəfər şəxsi heyəti cəlb olunub. Yanğın söndürülüb və digər ərazilərə keçməsinin qarşısı alınıb. Ev sahibinin sözlərinə görə, evdəki qızıl-zinət əşyaları və 5 min manat da yanıb.
İlkin məlumata görə, yanğının elektrik naqillərində yaranan qısa qapanmadan baş verdiyi ehtimal olunur.
Faktla bağlı araşdırma aparılır.