İranın “dosye”si BMT Təhlükəsizlik Şurasına verilərsə, Tehran nüvə yanacağı istehsalına başlayacaqdır.
AZƏRTAC xəbər verir ki, “Fars” agentliyinin yaydığı məlumata görə, bunu İranın Beynəlxalq Atom Enerjisi Agentliyi (BAEA) yanında daimi nümayəndəsi Əli Əsgər Soltaniyə bəyan etmişdir. O demişdir ki, İranın nüvə proqramı ilə bağlı fikir ayrılıqlarının tənzimlənməsi məqsədi ilə Tehran danışıqlar prosesinin davam etdirilməsində maraqlıdır. Hələ elə məsələlər qalır ki, biz onları müzakirə edə bilərik. Bu danışıqların növbəti dövrəsi fevralın 16-da Moskvada olacaqdır. İran nümayəndə heyəti uranın Rusiya ərazisində saflaşdırılması üçün Moskvanın müştərək müəssisə yaradılmasına dair təklifinin müzakirəsi üçün şimal qonşusunun paytaxtına cavab səfərinə gedəcəkdir.
Soltaniyə Tehranın rəsmi mövqeyini - Nüvə silahının yayılmaması haqqında müqavilənin müddəalarına İranın sadiq qaldığını nəzərə çarpdırmışdır. O xatırlatmışdır ki, İranda uranın saflaşdırılması və nüvə yanacağı istehsalı üzərində moratorium hələ də qüvvədə qalır. Buna baxmayaraq, İranın nüvə dosyesi BMT Təhlükəsizlik Şurasına verilərsə, Tehran nüvə yanacağının istehsalına başlayacaqdır.
