Naxçıvan, 10 may (AZƏRTAC). İnsan ömrü Tanrının bəxş etdiyi əvəzsiz nemətdir. İnsan var ki, əsrə bərabər ömür yaşasa da, mənasız olduğu üçün yaddaşlardan silinib gedir. İnsan da var ki, özü həyatda yaşamasa belə, izi, sorağı xalqının yaddaşından, təfəkküründən silinmir. Millətinin, xalqının tarixinə həkk olunur. Belə bir ömür hər kəsə nəsib olmur. Həyatı sonrakı nəsillər üçün məktəb olan, xalq, el-oba üçün yaşayan belə xeyirxah insanlar haqqında düşünərkən fikrimizin fövqündə çox əzəmətli, məğrur, siyasətçi, son dərəcə qüdrətli obraz canlanır.

Bu, Azərbaycan xalqının ümummilli lideri Heydər Əliyevin obrazıdır. Onu hamı sevirdi. Yaşından, sosial vəziyyətindən asılı olmayaraq hər kəs! Bu məhəbbət təmənnasız idi. Bəlkə də bu sevgi onun gördüyü işlərin müqabilində minnətdarlıq hissinin ifadəsi idi. Ona olan rəğbət respublikaya rəhbər seçildiyi ilk gündən yaranmağa başlamışdı. Onun qeyri-adi xüsusiyyətləri, indiyədək Azərbaycana başçılıq etmiş şəxslərin heç birində təsadüf olunmayan keyfiyyətləri də vardı. Qısa zamanda geniş və çoxcəhətli fəaliyyəti sayəsində Azərbaycanı inkişafa qovuşdurdu. Bənzərsiz, cəsarətli, tükənməz enerjili dövlət rəhbəri Heydər Əliyev təkrarsız keyfiyyətlərinə görə tarixə öz adını əbədi yazdı. Görkəmli siyasətçi olan Heydər Əliyev bu yüksəlişə çatana qədər mürəkkəb dövlətçilik yolu keçmişdir.

Heydər Əliyev təbiəti etibarilə son dərəcə demokratik, açıq şəkildə işləməyi, xalqla daim təmasda olmağı sevən rəhbərlərdən idi. Odur ki, onu müşahidə etmək, “öyrənmək” heç bir çətinlik törətmirdi. Həm sovetlər dövründə, həm də müstəqillik illərində Azərbaycan xalqı Heydər Əliyevi dərin məhəbbətlə sevirdi. Söhbət təmənnasız, cəmiyyətin bütün təbəqələrini əhatə edən sevgidən gedir.

Bu sevginin səbəbi nə idi?

Həyatda qarşılaşdığı bütün çətinliklərə və üzləşdiyi məhrumiyyətlərə baxmayaraq, Heydər Əliyev yalnız xalqını düşünən böyük şəxsiyyət idi. Ulu Yaradan ona bütün fiziki və mənəvi keyfiyyətləri səxavətlə vermişdi. Digər tərəfdən, ulu öndər Heydər Əliyevin öz bilik və bacarığını, zəngin təcrübəsini tətbiq etmək üçün geniş meydan vardı. Əlbəttə, bu meydana girmək, özünü sübut etmək, layiq olduğun mərtəbəyə yüksəlmək üçün gərgin zəhmətə qatlaşmaq, gecə-gündüz yorulmaq bilmədən çalışıb-çarpışmaq tələb olunurdu. Ulu öndər bütün bu vəzifələrin öhdəsindən daim ləyaqətlə gəldi. Azərbaycanın 35 illik bir dövrünü əhatə edən tarixi bu illər ərzində xalqın ictimai-siyasi, iqtisadi və mədəni həyatının bütün sahələrində dirçəliş bilavasitə Heydər Əliyevin adı ilə bağlıdır. Azərbaycanı müstəqil dövlət quruculuğuna aparan yol öz başlanğıcını əslində, 1969-cu ildən - məhz onun hakimiyyətə gəlişindən götürmüşdü. Ulu öndərin hakimiyyətə gəlişindən sonra Azərbaycanda xalq təsərrüfatının bütün sahələrində inkişaf başlandı. Sənayedə, kənd təsərrüfatında, mədəniyyət sahəsində, incəsənət, kino, teatr, rəssamlıq və digər sahələrdə də intibah dövrü başlandı. Bu, əlbəttə, ulu öndərin şəxsiyyəti, fəaliyyəti, işgüzarlığı, dərin məntiqi, yüksək qabiliyyəti, intellektual səviyyəsi ilə bağlı idi. Azərbaycan ulu öndərin rəhbərlik etdiyi 1969-1982-ci illərdə sovet respublikaları içərisində öncül yerə keçdi. Bu isə sovet dövrü üçün çox böyük bir hadisə idi. Heydər Əliyevin hakimiyyətə gəlməsi ilə rüşvətxorluğa, korrupsiyaya qarşı mübarizə gücləndirildi. Azərbaycanda insanların dövlətçilik şüurunun möhkəmləndirilməsi istiqamətində böyük işlər görüldü. Azərbaycan qısa zaman kəsiyində ittifaq miqyasında iqtisadi-sosial baxımdan özünü təmin etməyə qadir olan respublikalar sırasına çıxdı. Məhz həmin illər ərzində Azərbaycanda ən böyük abadlıq işləri görülmüş, müasir Azərbaycan memarlığının əsərləri sayılan və respublikanın siyasi və mədəni həyatında böyük əhəmiyyəti olan neçə-neçə binalar tikilib istifadəyə verilmişdir. Heydər Əliyevin mədəniyyətimizə, tariximizə dərin ehtiram nümayiş etdirərək göstərdiyi qayğı sayəsində Azərbaycanın ən görkəmli yerlərində xalqımızın milli varlığının daşıyıcısı olan böyük insanların əzəmətli heykəlləri ucaldılmış, böyük tarixi şəxsiyyətlərin hər biri üçün bir mədəniyyət mərkəzinə çevrilən ev-muzeyləri yaradıldı.

Heydər Əliyevin Azərbaycanın gələcəyini düşünərək uzaqgörənliklə atdığı addımlardan biri də azərbaycanlı gənclərin gələcəyin müstəqil ölkəsi üçün gərəkli ixtisaslara yiyələnməkdən ötrü keçmiş Sovetlər İttifaqının nüfuzlu ali məktəblərinə göndərmək təcrübəsi kimi dəyərli təhsil ənənəsinin əsasını qoyması idi. Bu yolla Azərbaycanımızın elmi və kadr potensialı yüksəldiyi kimi, xalqımızın milli mənəvi, əxlaqi dəyərlərinin təbliği də həyata keçirilirdi.

Heydər Əliyev bütün sahələrdə olduğu kimi, ordu sıralarında da milli kadrların yetişməsinə və yerləşməsinə çalışırdı. Ölkəyə birinci rəhbərliyi dövründə Azərbaycanda fəaliyyət göstərən hərbi məktəblərlə maraqlanan ümummilli lider orada müəllim-kursant heyəti içərisində azərbaycanlıların sayının artırılması üçün tədbirlər görmüş, gənclərin hərbi peşəyə yiyələnməsinə çalışmışdır. Əlbəttə, sovetlər birliyi məkanında bu, o qədər də asan məsələ deyildi. Üstəlik, o dövrdə gənclərimiz hərbi peşələrə kifayət qədər maraq göstərmirdilər. Dərin zəka sahibi və uzaqgörən siyasətçi Heydər Əliyev məsələnin köklü şəkildə həlli yolunu tapdı. Çox keçmədən onun təşəbbüsü və şəxsi himayəsi altında Cəmşid Naxçıvanski adına hərbi təmayüllü məktəb açıldı. Tezliklə bu məktəb böyük şöhrət qazandı. Yeniyetmələr həvəslə burada oxumağa gəlir, sonra təhsillərini keçmiş SSRİ-nin müxtəlif ali hərbi məktəblərində uğurla davam etdirirdilər. Müstəqillik dövründə milli ordu quruculuğunda vaxtilə C.Naxçıvanski adına hərbi təmayüllü məktəbi bitirən zabitlərin əməyi böyük olmuşdur. Onlar bu gün də orduda ləyaqətlə xidmət edir, Heydər Əliyev ideyalarına sadiqliklərini nümayiş etdirirlər. Ümummilli liderimizin təşəbbüsü ilə ölkəmizdəki digər hərbi məktəblər də beynəlxalq standartlara uyğunlaşdırılmış, maddi-texniki bazası möhkəmləndirilmişdir. Hər il kursantların buraxılış mərasimində iştirak edən ulu öndər Heydər Əliyev onlara öz tövsiyələrini verirdi. Ümummilli liderin qoyduğu ənənələr digər sahələrdə olduğu kimi, ordu quruculuğunda da müvəffəqiyyətlə davam etdirilir.

Ulu öndərimiz 1990-cı ilin 20 yanvarında sovet qoşunlarının Bakıda törətdiyi qanlı faciə ilə əlaqədar ertəsi gün Azərbaycanın Moskvadakı Daimi Nümayəndəliyində bəyanatla çıxış edərək, Azərbaycan xalqına qarşı törədilmiş cinayətin təşkilatçıları və icraçılarının cəzalandırılmasını tələb etmişdir. O, Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq Sovet İttifaqı Kommunist Partiyasının sıralarından çıxmışdır.

1990-cı ilin iyulunda Azərbaycana qayıdan Heydər Əliyev Naxçıvanda yaşamış, həmin ildə də Azərbaycanın və Naxçıvanın Ali qanunverici orqanlarına deputat seçilmişdir. O, 1991-1993-cü illərdə Naxçıvan Muxtar Respublikası Ali Məclisinin Sədri kimi fəaliyyət göstərərək muxtar respublikanın inkişafının əsaslarını hazırlamışdır.

1993-cü ilin may-iyun aylarında Azərbaycan xalqı Heydər Əliyevin hakimiyyətə gətirilməsi tələbi ilə ayağa qalxdı. Azərbaycanın o zamankı rəhbərləri Heydər Əliyevi rəsmən Bakıya dəvət etməyə məcbur oldular. Heydər Əliyev 1993-cü il iyunun 15-də Azərbaycan Ali Sovetinin Sədri seçildi, iyulun 24-də isə Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başladı.

1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçildi. O, 1998-ci il oktyabrın 11-də xalqın yüksək fəallığı şəraitində keçirilən seçkilərdə səslərin 76,1 faizini toplayaraq yenidən Azərbaycan Respublikasının Prezidenti seçildi.

Ümummilli liderin Azərbaycanın əsl dövlət müstəqilliyi qazandığı dövrdə siyasət meydanında olması, buna qədər isə təkcə xalqın məhəbbətini deyil, həm də etimad və etibarını qazanması taleyin qisməti idi. “Mən həyatımın qalan hissəsini də doğma xalqıma bağışlayıram”-deyən ulu öndər bütün ömrünü xalqının xoşbəxtlik və səadətinə həsr etmişdir.

Tarixin yetirdiyi görkəmli şəxsiyyətlərdən olan Heydər Əliyevin zəkası bütün sədləri yararaq və qarşıya çıxan heç bir çətinliyə baxmayaraq Azərbaycanı olduqca mürəkkəb zamanın dalğaları arasından salamat çıxarıb ona həm bölgədə, həm də dünyada layiqli yer qazandırmışdır. Xalqın sevdiyi şəxsiyyətlər əbədiyaşar olurlar. Ulu öndər Heydər Əliyev isə bu əbədiyaşarlığı hələ sağlığında qazanmışdır.

Rabil Kətanov

AZƏRTAC-ın müxbiri

АzərТAc