GÜRCÜSTAN PARLAMENTİNİN SƏDRİ TƏKZİB EDİR
AZƏRTAC-ın xüsusi müxbiri xəbər verir ki, görkəmli rus yazıçısı və diplomatı Aleksandr Qriboyedovun Tbilisidə, yazıçı və ictimai xadimlərin Mtasminda dağındakı Panteondan cəsədinin çıxarılıb aparılacağı barədə son günlər şayiələr gəzir. Hətta “İmedi” telekanalı aprelin 11-də xəbər yaymışdır ki, bir sıra ictimai xadimlərin və məşhur yazıçıların, o cümlədən Stalinin anası Yekaterina Cuqaşvilinin, Aleksandr Qriboyedovun cəsədlərinin başqa yerdə dəfn edilməsinə dair təkliflər hazırlanır.
Gürcüstan parlamentinin sədri Nino Burcanadze bu xəbərlərə münasibətini bildirərək demişdir: “Belə şayiələrin yayılması Gürcüstanı dünya birliyinin nəzərindən salmağa yönəldilmiş fitnəkarlıqdır. Böyük rus şairi və yazıçısı Aleksandr Qriboyedovun Gürcüstanda məzarı üçün heç bir təhlükə yoxdur”.
Xanım Burcanadze vurğulamışdır ki, gürcülər Rusiya ilə münasibətlərin həttə son dərəcə kəskinləşdiyi vaxtda belə, rusları milli əlamətə görə sıxışdırmamışlar. Gürcüstanda əcnəbilərə heç zaman nifrət olmayıb və olmayacaqdır.
Bölmənin digər xəbərləri
