FİDEL KASTRO QAYIDIR
AZƏRTAC Frans Press agentliyinə istinadla xəbər verir ki, Fidel Kastro aprelin axırında Kuba prezidenti səlahiyyətlərini özünə qaytaracaqdır. Boliviya Prezidenti Evo Morales bildirmişdir ki, bu, aprelin 28-də - “Amerika üçün Boliviya alternativi” (ALBA) təşkilatı yaradılmasının üçüncü ildönümü günü baş verəcəkdir.
Bu regional birliyə Venesuela, Kuba, Boliviya və Nikaraqu daxildir.
Moralesin sözlərinə görə, “Fidel qardaşın” hakimiyyətə qayıtması mərasimində altı dövlətin başçıları iştirak edəcəklər. Boliviya lideri Kastronun qayıtmaq niyyətində olduğunu kimdən eşitdiyini açıqlamamışdır.
Martın 16-da Kuba Milli Assambleyasının sədri Rikardo Alarkon bildirmişdir ki, Kastro 2008-ci ilin martında keçiriləcək parlament seçkilərinədək “əla formada” olacaqdır. Ötən şənbə günü xarici işlər naziri Felipe Peres Roke demişdir ki, komandante kökəlmişdir və hər gün fiziki hərəkətlər yerinə yetirir.
Xatırladaq ki, 47 il Kubanı idarə etmiş Fidel Kastro 2006-cı il iyulun 1-də bağırsağında cərrahiyyə əməliyyatı aparıldığına görə, dövlət başçısı vəzifələrinin icrasını müvəqqəti olaraq kiçik qardaşı Raula vermişdir. Buna baxmayaraq, 80 yaşlı Kastro Kuba Dövlət Şurasının sədri, Kommunist Partiyasının birinci katibi və Nazirlər Şurasının sədri vəzifələrini özündə saxlayır.
Bölmənin digər xəbərləri
