DOSTLUQ SƏRHƏD TANIMIR
AZƏRTAC xəbər verir ki, “Novosti Uzbekistana” qəzetində Daşkənddəki Azərbaycan Mədəniyyət Mərkəzləri Assosiasiyasi idarə heyətinin sədri Akif Ağatalıbovun müsahibəsi dərc olunmuşdur. O, Azərbaycan və türk diasporları rəhbərlərinin bu yaxınlarda Bakıda keçirilmiş birinci forumunda iştirak etmişdir.
A.Ağatalıbov demişdir: “Görüş iştirakçıları Özbəkistandakı Azərbaycan diasporunun fəaliyyəti ilə də maraqlanırdılar. Diasporumuzun 42 min üzvü var. Biz digər diasporlarla birlikdə “Özbəkistan ümumi evimizdir” festivalı çərçivəsində keçirilən tədbirlərdə iştirakımızdan danışdıq. Nümayəndə heyətimiz Azərbaycan Prezidenti İlham Əliyevin qəbulunda oldu. Dövlət başçısı Özbəkistandakı Azərbaycan diasporunun fəaliyyətini, onun xalqlarımız arasında dostluq münasibətlərinin möhkəmlənməsinə töhfəsini yüksək qiymətləndirdi. Bu günlərdə mənim akademik Yusif Məmmədəliyev adına qızıl medala layiq görülməyim diasporumuzun fəaliyyətinin daha bir təsdiqidir. Özbəkistan Beynəlmiləl Mədəniyyət Mərkəzinin köməyini xüsusi qeyd etmək istərdim. Onun sayəsində biz xalqlarımız arasında dostluq körpüləri salır, yaşadığımız ölkənin tərəqqisinə öz töhfəmizi veririk. Dostluğumuz sərhəd tanımır. Bu, həm Azərbaycanda, həm də Özbəkistanda qeyd olunan Novruz bayramı günlərində xüsusilə nəzərə çarpırdı”.
Bölmənin digər xəbərləri
