DAŞKƏNDDƏ TERROR AKTLARI TÖRƏDİLMİŞDİR

29.03.2004 [20:00]
Çap et
A⁺ A^-

AZƏRTAC-ın xüsusi müxbiri xəbər verir ki, martın 29-da səhər saat 8.30 dəqiqədə Daşkəndin mərkəzində - “Çorsu” bazarının ərazisindəki “Uşaq aləmi” univermağının qarşısında partlayışlar törədilmişdir. Azı iki nəfər həlak olmuş, iyirmi beş nəfərə yaxın adam yaralanmışdır.

Özbəkistanın güc strukturlarından bildirmişlər ki, həmin ərazidə eyni vaxtda bir neçə yerdə terror aktı törədilmişdir və bu, planlaşdırılmış aksiyadır. Partlayışlarla bağlı şübhəli şəxslər saxlanmışdır.

Özbəkistan paytaxtında təhlükəsizlik tədbirləri görülür. Küçələrdə minik maşınları yoxlanır. Paytaxtda bazarların və mağazaların əksəriyyəti bağlıdır. Müxtəlif istiqamətlərdən şəhərə giriş məhdudlaşdırılmışdır.

1999-cu il fevralın 16-da Daşkənddə törədilən partlayış hadisələrindən sonra bu, ikinci terror aktıdır. Həmin partlayışlarda 20 nəfər həlak olmuş, yüzdən artıq adam yaralanmışdı.

Terror aktları ilə bağlı televiziyada Özbəkistan Prezidenti İslam Kərimovun xalqa müraciəti gözlənilir.