BÖYÜK ÇİN SƏDDİ MÜHAFİZƏ EDİLƏCƏKDİR

16.02.2006 [15:01]
Çap et
A⁺ A^-

AZƏRTAC “Çaynə deyli” qəzetinin saytına istinadla xəbər verir ki, təsərrüfat fəaliyyəti və müasir mədəniyyətsizlik nəticəsində Böyük Çin səddinin dağılması elə ciddi miqyas almışdır ki, hökumət ölkənin dünya şöhrətli abidəsinin qorunub saxlanması üçün xüsusi idarə yaratmalı olmuşdur.

“Səddin müdafiəçiləri” briqadaları yaxınlıqda yerləşən yaşayış məntəqələrinin sakinlərindən yaradılır. Onlara məvacibi yerli inzibati orqanlar verəcəklər.

Pekin Mədəni İrs İdarəsinin məlumatına görə, nəhəng qurğunun Böyük Pekin hüdudları daxilindəki hissəsinin yalnız 20 faizi qənaətbəxş vəziyyətdədir. Səddin hazırda turistlər üçün iki sahəsi tam bərpa edilmişdir. Lakin orada da ekskursiyaçılar öz adlarını “əbədiləşdirməyə” çalışırlar.

Böyük Çin səddinin ümumi uzunluğu təxminən 6,5 min kilometrdir. Onu hələ eramızdan əvvəl 4-3-cü əsrlərdə inşa etməyə başlamışdılar.