İngiltərə yığmasının kapitanı Devid Bekhem Beynəlxalq Futbol Federasiyasının (FİFA) prezidenti Yozef Blatteri məyus etmişdir.
AZƏRTAC xəbər verir ki, Britaniyanın Bi-Bi-Si telekanalının yaydığı məlumata görə, FİFA prezidenti onun etirafına tənqidi münasibət göstərmişdir. Məlum olduğu kimi, oktyabrın 12-də ingilislərin və Madridin “Real” klubunun yarımmüdafiəçisi jurnalistlərə bildirmişdir ki, 2006-ci il dünya çempionatının seçmə turnirində Uels komandasına qarşı oyunda sarı vərəqə almaq üçün qaydanı qəsdən pozmuşdur.
Y.Blatter demişdir ki, Bekhemin özünü bu cür aparması şərəfli oyun prinsipini uca tutan futbolçuya yaraşan hərəkət deyildir. Axı, Bekhem təqlid olunmaq üçün nümunədir. O bildirmişdir ki, bu məsələni İngiltərə Futbol Federasiyasının sədri ilə Bakıda Azərbaycan-İngiltərə görüşündə olarkən müzakirə etmək niyyətindədir.
FİFA Bekhemin etirafı ilə əlaqədar hələlik heç bir rəsmi bəyanat verməmişdir.
