Prezidentlər Leonid Kuçma və İlham Əliyev qəbulda nitq söylədilər.

UKRAYNA PREZİDENTİ LEONİD KUÇMANIN

NİTQİ

- Çox hörmətli İlham Heydəroviç!

Çox hörmətli Mehriban xanım!

Hörmətli xanımlar və cənablar!

Əziz dostlar!

Azərbaycan Respublikasının Prezidenti İlham Heydəroviç Əliyevi və Mehriban xanımı Kiyevdə salamlamağa ürəkdən şadam.

Qardaş Azərbaycanın rəhbərliyi ilə hər bir görüş zamanı özümü həqiqi dostların və etibarlı tərəfdaşların əhatəsində hiss edirəm.

Son on il ərzində Ukrayna ilə Azərbaycan arasında xüsusilə səmimi və mehriban münasibətlər yaranmışdır. Biz dövlətlərarası qarşılıqlı əlaqələrin yüksək səviyyəsinə nail olmuşuq, əslində, bütün sahələrdə əməkdaşlığın səmərəli mexanizmini qaydaya salmışıq. Nəzərə çarpdırmaq istəyirəm ki, biz ikitərəfli münasibətlərin inkişafında yüksək nəticələrə daha çox Azərbaycanın görkəmli siyasi və dövlət xadimi, Ukraynanın böyük dostu möhtərəm Heydər Əliyevin şəxsi töhfəsi sayəsində nail olmuşuq. Hesab edirəm ki, Kiyevdə abidənin ucaldılması onun nurlu xatirəsinin layiqli rəmzidir.

Belə bir fakt xüsusi ümid doğurur ki, təşəkkül tapmış olan Ukrayna-Azərbaycan dostluğu ənənələrini Azərbaycan dövlətinin indiki başçısı şərəflə davam etdirir və yeni məzmunla dolğunlaşdırır. İlham Heydəroviçin indiki səfəri nəinki yüksək səviyyədə siyasi dialoqun növbəti mərhələsi olmuşdur, həm də Azərbaycanın xarici siyasətinin varisliyini təsdiq edir, respublika rəhbərliyinin Ukrayna ilə strateji tərəfdaşlığı daha da dərinləşdirməyə hazır olduğuna inandırıcı sübutdur. Bu gün bütün danışıqlar Ukrayna-Azərbaycan münasibətlərinin – ticarət-iqtisadi, nəqliyyat sahələrində münasibətlərin yeni öncül vəzifələrini də müəyyənləşdirməyə imkan verdi. Biz mühüm regional layihələrin həyata keçirilməsində ilk növbəli addımları müəyyənləşdirdik.

Mühüm cəhət budur ki, hər iki ölkənin mövqeləri beynəlxalq siyasət sahəsində də, əsasən, uyğun gəlir. Biz sülh və təhlükəsizliyə görə məsuliyyəti dərk edirik, onların möhkəmlənməsinə öz töhfəmizi vermək istəyirik. Bu baxımdan ümumdünya forumlarında, beynəlxalq təşkilat və birliklərdə Ukraynanın mövqeyini dəstəklədiyinə görə Azərbaycan tərəfinə minnətdarlığımızı bildirmək istəyirəm. Əminəm ki, dövlətlərimiz bundan sonra da sadiq müttəfiq və tərəfdaş olacaqlar. Müdrik bir Azərbaycan kəlamında deyildiyi kimi, tək əldən səs çıxmaz. Əminəm ki, biz bugünkü təhdidlərə ancaq əl-ələ verib müqavimət göstərə bilərik. Yalnız qarşılıqlı fəaliyyət göstərməklə müştərək strateji planları gerçəkləşdirə və müasir dünyada layiqli rol oynaya bilərik.

Çox hörmətli cənab Prezident!

Xanım Əliyeva!

Əziz dostlar!

Böyük məmnuniyyətlə sizin sağlığınıza badə qaldırmağı təklif edirəm. Azərbaycanda deyildiyi kimi, bağınız bəhrəli, torpağınız bərəkətli olsun. Ukrayna və Azərbaycan xalqlarının tərəqqisi şərəfinə! Dostluğumuzun və qarşılıqlı anlaşmamızın şərəfinə! Beynəlxalq aləmdə uğurlarımızın şərəfinə!

AZƏRBAYCAN PREZİDENTİ İLHAM ƏLİYEVİN NİTQİ

- Çox hörmətli Leonid Daniloviç!

Möhtərəm Lyudmila Nikolayevna!

Əziz dostlar!

Hörmətli Leonid Daniloviç, əvvəla, izn verin, qardaş Ukraynaya dövlət səfərinə dəvət edildiyimə görə Sizə dərin minnətdarlığımı bildirim. Bu səfər artıq indidən çox uğurlu oldu. Bu gün keçirilən təkbətək və geniş heyətdə görüşlər, habelə imzalanmış sənədlər sübut edir ki, Ukrayna ilə Azərbaycan arasında dostluq və qardaşlıq münasibətləri inkişaf edir və möhkəmlənir. Ölkələrimizin və xalqlarımızın ümummilli liderləri Leonid Kuçma və Heydər Əliyev bu münasibətlərin inkişafına böyük tövfə vermişlər. Onların ölkələrimizin müstəqilliyinin inkişafına və möhkəmlənməsinə yönəlmiş ardıcıl və uzaqgörən siyasəti sayəsində həm Ukrayna, həm də Azərbaycan beynəlxalq aləmdə də, ölkədaxili iqtisadi və sosial vəzifələrin həllində də böyük uğurlara nail olmuşdur. Əlbəttə ki, ölkələrimiz arasında əlaqələrin inkişafı və möhkəmlənməsi işində Leonid Daniloviç Kuçma ilə Heydər Əlirza oğlu Əliyev arasında olan şəxsi münasibətlər böyük rol oynamışdır. Dostluq, qarşılıqlı hörmət, qarşılıqlı kömək, bir-birini dəstəkləmək hissləri ölkələrimiz arasında münasibətlərə həmişə xas olmuşdur. Dövlətlərimizin tarixində elə hal olmamışdır ki, aramızda hər hansı bir fikir ayrılığı, yaxud müəyyən problemə müxtəlif münasibətlər meydana çıxsın. Xalqlarımız ölkələrimizin möhkəmlənməsi və müstəqilliyi kimi yeganə məqsədə doğru birgə addımlamışlar. Ukrayna Prezidentinin qərarı ilə sabah Azərbaycanın ümummilli lideri Heydər Əliyevin abidəsinin açılması faktı Leonid Daniloviçin Heydər Əliyevə dərin şəxsi münasibətini və ölkələrimiz arasında əlaqələrin nə dərəcədə möhkəm olduğunu və bu əlaqələrin heç vaxt, heç kim tərəfindən pozula bilməyəcəyini sübut edir. Bizim vəzifəmiz bu münasibətləri inkişaf etdirmək, möhkəmləndirmək və təkmilləşdirməkdir, elə etməkdir ki, Ukrayna və Azərbaycan uzun illər, əsrlər dost və qardaş ölkələr, strateji tərəfdaşlar olaraq qalsınlar. Ukrayna və Azərbaycan həm ikitərəfli münasibətlərdə, həm də regional miqyasda, habelə mühüm beynəlxalq problemlərin həlli çərçivəsində həmişə çiyin-çiyinədir. Onlar eyni mövqedən çıxış edirlər. Leonid Daniloviçin qeyd etdiyi kimi, beynəlxalq qurumlarda qarşılıqlı yardım bizim qardaşlıq münasibətlərimizə çox parlaq sübutdur.

Bu gün fürsətdən istifadə edərək, Ermənistan-Azərbaycan, Dağlıq Qarabağ münaqişəsinin Azərbaycanın ərazi bütövlüyü və beynəlxalq hüquq normalarının prinsipləri çərçivəsində nizama salınması məsələsində Ukraynanın prinsipial, birmənalı mövqeyinə görə Leonid Daniloviçə bir daha təşəkkür etmək istəyirəm.

İqtisadi baxımdan çox böyük uğurlar var. Əmtəə dövriyyəsi artır, ötən il xeyli çoxalmışdır. İlin əvvəlindən bəri əmtəə dövriyyəsi 70 faiz artmışdır. Bu, çox şey deyir. Əvvəla, ölkələrimizin iqtisadiyyatları inkişaf edir. Deməli, ölkələrimizdə aparılan iqtisadi siyasət uğurludur. İnteqrasiyaya qarşılıqlı səylərimiz və meylimiz də artır. Biz buna çalışırıq. Biz çalışırıq ki, Ukrayna ilə ikitərəfli münasibətlər bundan sonra da inkişaf etsin.

Mən bu yaxınlarda Azərbaycan Prezidenti seçilmişəm. Bütün istiqamətlərdə - daxili siyasətdə də, xarici siyasətdə də Heydər Əliyevin siyasətini davam etdirmişəm və davam etdirirəm. Çünki bu, yeganə düzgün siyasətdir və onun alternativi yoxdur. Azərbaycan xalqı seçkilərdə bu siyasətə səs vermişdir və Azərbaycan millətinin və dövlətinin inkişafının gələcək yüksəlişini yalnız bu siyasət təmin edə bilər.

İkitərəfli münasibətlərimiz çərçivəsində də belədir. Mən bu gün bu barədə Leonid Daniloviçə dedim, ölkələrimiz və onların rəhbərləri arasında təşəkkül tapmış bütün dostluq, qardaşlıq, qarşılıqlı yardım, dəstək ənənələrini davam etdirəcəyəm. Çox sevindirici haldır ki, bütün səviyyələrdə - nazirlər, idarələrin rəhbərləri səviyyəsində də çox yaxşı əlaqələr və qarşılıqlı anlaşma var. Mən çox şadam ki, bu gün dost torpaqda, qardaş Ukraynadayam. Mehriban xanıma, mənə və nümayəndə heyətimizin üzvlərinə göstərilən hərarətli, səmimi qəbula və qonaqpərvərliyə görə çox-çox təşəkkür edirəm.

Çox hörmətli Leonid Daniloviç, bu dəvətə görə, xoş münasibətə, dostluq və qardaşlığı dəstəkləyən səmimi sözlərə görə Sizə bir daha təşəkkür etmək istəyirəm.

Bu badəni çox hörmətli Ukrayna Prezidenti Leonid Daniloviç Kuçmanın, çox hörmətli Lyudmila Nikolayevnanın, ukraynalı qardaşlarımızın şərəfinə qaldırmaq istəyirəm.

Ukraynanın və Azərbaycanın tərəqqisi şərəfinə!

X X X

Rəsmi qəbulun sonunda Ukraynanın incəsənət xadimləri maraqlı konsert proqramı ilə çıxış etdilər.