AVROPADA 30 İLDƏ GÖRÜNMƏMİŞ QAR YAĞIR

30.01.2006 [22:52]
Çap et
A⁺ A^-

AZƏRTAC “Novosti” agentliyinə istinadla xəbər verir ki, İspaniyanın cənub-qərbində güclü qar yağması ilə əlaqədar avtonəqliyyatın hərəkəti çətinləşmiş və təxminən 1000 nəfər gecəni mehmanxanalarda və monastırlarda keçirmişdir. Seviliyada son 30 ildə ilk dəfə qar yağmışdır. Bir çox rayonlarda təhsil müəssisələri bağlanmış, dəmir yolu və hava nəqliyyatının hərəkətində fasilələr yaranmışdır. Ötən həftə pis hava şəraiti üzündən yol-nəqliyyat qəzalarında 25 nəfər həlak olmuş, 14 adam ciddi zədə almışdır.

Fransanın cənubunda və mərkəzində bəzi yerlərdə qar örtüyünün qalınlığı 35 santimetrə çatmışdır. Bəzi kəndlərdə evlərə elektrik enerjisinin verilməsi dayandırılmışdır.

İtaliyada Milandan Genuyayadək böyük ərazi qardan ziyan çəkmişdir. Dağ rayonlarında qar örtüyünün qalınlığı 1 metə çatmışdır. Bu, Olimpiya oyunlarının təşkilat komitəsini məşəlin daşınması estafetini dayandırmağa məcbur etmişdir.

Lissabon da güclü qar yağmasına və borana məruz qalmışdır. Portuqaliya paytaxtının sakinləri 50 ildən çoxdur belə hava şəraiti ilə üzləşməmişdilər.