Alimlər “universal” böyrək yaradıblar
Bakı, 16oktyabr, AZƏRTAC
Onillik araşdırmalardan sonra alimlər orqan transplantasiyasında böyük irəliləyişə nail olublar. Kanada və Çin tədqiqatçılarından ibarət qrup nəzəri olaraq hər bir insana köçürülə bilən “universal” böyrək hazırlayıb.
AZƏRTAC sciencealert.com saytına istinadla xəbər verir ki, alimlər xüsusi fermentlərdən istifadə edərək A tipli böyrəyi O tipli böyrəyə çevirməyi bacarıblar. Bu fermentlər A qan qrupuna xas olan şəkər molekullarını, yəni antigenləri çıxarır və nəticədə böyrək “neytral” hala gəlir. Beləliklə, immun sistem orqanı yad kimi qəbul etmir. Sınaq zamanı bu “universal” böyrək beyin ölümü keçirmiş bir insanda bir neçə gün fəaliyyət göstərib.
Üçüncü gündən etibarən A tipli əlamətlərin yenidən yaranmasına baxmayaraq, immun reaksiyanın zəif olması ümidverici nəticə sayılır. Mütəxəssislərin sözlərinə görə, bu kəşf gələcəkdə fərqli qan qrupları arasında böyrək transplantasiyasını asanlaşdıra və gözləmə müddətini xeyli azalda bilər. Hazırda yalnız Amerika Birləşmiş Ştatlarında hər gün 11 nəfər uyğun böyrək tapılmadığı üçün həyatını itirir.
Tədqiqat “Nature Biomedical Engineering” jurnalında dərc olunub.
Bölmənin digər xəbərləri
