ABŞ İRAQDA 1052 HƏRBÇİ İTİRMİŞDİR

01.10.2004 [20:18]
Çap et
A⁺ A^-

AZƏRTAC xəbər verir ki, Pentaqonun sentyabrın 30-da yaydığı məlumata görə, ABŞ Silahlı Qüvvələri İraqda ötən il martın 20-də başlanan hərbi əməliyyatlarda 1052 əsgər və zabit itirmişdir. Onların 798-i hərbi toqquşmalarda, qalanları isə bədbəxt hadisələr nəticəsində həlak olmuşdur.

ABŞ Müdafiə Nazirliyinin məlumatında deyilir ki, 5,5 mindən çox amerikalı hərbi qulluqçu yaralanmışdır. Prezident Corc Buşun İraqda əsas döyüş əməliyyatlarının başa çatdığını elan etdiyi 2003-cü il mayın 1-dən bəri ABŞ qoşunları bu ölkədə 914 nəfər itirmişlər.

Bağdaddan alınan xəbərlərə görə, sentyabrın 30-da İraqda daha iki amerikalı hərbi qulluqçu həlak olmuşdur.

İraqda koalisiya qüvvələrinin tərkibində olmuş və indi də olan digər ölkələrin bölmələri də itkilər vermişlər. Pentaqonun məlumatına görə, İraqda İtaliya 19, Polşa 13, İspaniya 11, Ukrayna 8, Bolqarıstan 6, Slovakiya 3, Tailand və Hollandiyanın hərəsi 2, Danimarka, Macarıstan, Latviya, Estoniya və Salvadorun hərəsi bir hərbi qulluqçu itirmişlər. Böyük Britaniyanın hərbi komandanlığı 67 əsgər və zabit itirdiyini bildirmişdir.

ABŞ İRAQDA 1052 HƏRBÇİ İTİRMİŞDİR

MÜƏLLİFLƏ ƏLAQƏ

Bölmənin digər xəbərləri